April 17 - 27, 2018
Malaysian Airlines /Jet star Airlines
எங்கள் சர்வதேச பயண வரிசையில் ஆறாவது பயணமாக நாங்கள் சென்ற நாடு /கண்டம் ஆஸ்திரேலியா.
ஆஸ்திரேலியா ஒரு பாலைவனம்; மக்கள் அங்கே அதிகம் வசிப்பதில்லை; ஆறாம் வகுப்பு புவியியல் பாடத்தில் படித்த Great Dividing Range, Great barrier reef, Murray - Darling நதிகள், Canberra, Downs போன்ற சில விவரங்கள் தவிர வேறெதுவும் தெரியாத நிலையில் அந்தக் கண்டத்தை நேரில் காணும் ஆவலில் எங்கள் பெயரையும் பயணப் பட்டியலில் சேர்த்தோம்.ஐரோப்பாவிற்கு சென்ற அதே நண்பர்கள் குழுவுடன் தான் இந்தப் பயணமும் என்பதால் அதிக சிரமம் இல்லை. வழக்கம் போல கூடிப் பேசி விசா ஏற்பாடு செய்யப் பட்டது. Australian Embassy புது டில்லியில் உள்ளதால் சென்னையில் Biometrics, பாஸ்போர்ட் மற்றும் தேவையான documentsஐ Tata Consultancyயில் தந்தோம். 15 நாட்களில் பாஸ்போர்ட் கையில் கிடைத்தது. விசா என்பது ஒரு தாளில் தனியாக தரப்பட்டது. அமெரிக்க விசாவைப் போல பாஸ்போர்ட்டில் பதிவு செய்யப்படவில்லை.
விமானத்தில் ஒருவருக்கு ஒரு கைப்பெட்டி (7 kg), ஒரு Check in பெட்டி(27 kg) எடுத்து செல்ல அனுமதி உண்டு. எல்லா வெளி நாட்டுப் பயணங்களை போல இதிலும் இலை, தழை, காய், கனி, விதைகள், வெள்ளை நிற பொருட்கள் போன்றவைகளை எடுத்து செல்லக் கூடாது.
ஆஸ்திரேலியாவில் பொது இடங்களில் புகை பிடிப்பது சட்டப்படி குற்றம் என கிளம்பும் முன்பே பல முறை எச்சரித்தார்கள்.
ஆஸ்திரேலியா southern hemisphere ல் அமைந்துள்ளதால் பருவ காலங்கள் நமக்கு நேரெதிர்.நவம்பர் - ஜனவரி மாதங்கள் அங்கே வெயிற் காலமாகவும் ஜூன்- ஆகஸ்ட் மாதங்கள் குளிர் காலமாகவும் இருக்கும். [கோயமுத்தூர் அவினாசிலிங்கம் பெண்கள் மேல் நிலைப் பள்ளியில் படித்த காலத்தில் அனைவராலும் அம்மா என்று அழைக்கப்பட்ட திருமதி. ராஜம்மாள் தேவதாஸ் அவர்கள் ஒவ்வொரு வருடமும் ஆஸ்திரேலியாவிற்கு கிறிஸ்துமஸ் சமயத்தில் தம் மகனது இல்லத்திற்கு சென்று வருவார். https://en.wikipedia.org/wiki/Rajammal_P._Devadas]
அதிக பட்ச குளிர் என்பது ஒரு டிகிரி(10 பாரன்ஹீட் தான் என ஒரு புத்தகத்தில் படித்தேன். ஏப்ரல் மாதத்தில் பொதுவாக வெப்பநிலை மிதமாக இருக்கும் என்பதால் சுற்றுலா செல்ல சிறந்த மாதம்.
ஆஸ்திரேலியாவிலும் பனி படர்ந்த மலை சிகரங்கள் உண்டென்றாலும் நாங்கள் அங்கே செல்லப் போவதில்லை என்பதால் குளிர் உடைகளுக்கான தேவை இல்லை. சகோதரி கலா தம்பதி மற்றும் என் கணவரின் நண்பர், அவர் மனைவி என மனதுக்கு நெருக்கமானவர்களுடனான பயணம்.
கோலாலம்பூர் வழியாக மெல்போர்ன் நகருக்கு செல்வதாக பயணத் திட்டம்.
ஏப்ரல் 17ஆம் தேதி காலை ஆறரை மணிக்கே சென்னை விமான நிலையத்தில் 50 பேரும் கூடினோம்.
ஒவ்வொரு பயணத்திற்கு முன்பும் எங்கள் குழு அமைப்பாளர்கள் எங்களுக்கு பயணத்திற்கு உதவும் வகையில் ஏதாவது ஒரு பரிசளிப்பார்கள். இம்முறை விமான நிலையம் சென்ற பிறகே Hooded flannel T shirt மற்றும் வெயில் தொப்பி தரப்பட்டது.
கையில் எடுத்து சென்றிருந்த காலை உணவை உண்டு முடித்து விட்டு 11.30 மணி விமானத்திற்கு Check in செய்ய உள்ளே சென்றோம். 2,630 கிலோமீட்டர் தூர பயணம். (4 மணி நேரங்கள்)
ஒரே குழுவாக சென்றதால் அனைவரும் அருகருகில் அமர்ந்து சென்றோம். பொதுவாக இது போல பயணிப்பவர்கள் அநேகமாக ஊர் சுற்றி பார்ப்பதில் மிகுந்த ஆவலுடன் இருப்பார்கள். Travel freaks. இருக்கை மாறி அமர்ந்து பேசிக் கொண்டே சென்றோம். எந்தெந்த நாடுகளுக்கு சென்றிருக்கிறார்கள், இந்தியாவில் எந்தெந்த ஊருக்கு சென்றிருக்கிறார்கள் அங்கே என்ன சிறப்பு என கூறிக் கொண்டே வந்தார்கள்.
கோலாலம்பூர் செல்லும் வரை எங்களுடன் பயணித்த அங்கே வசிக்கும் இந்திய பெண்மணியுடன் பேசி அந்த ஊரைப் பற்றிய பல செய்திகளை அறிந்தோம். ஜன்னல் ஓர இருக்கையை அவரிடமிருந்து பெற்று மலேசியாவின் ரப்பர் தோட்டங்களை வேடிக்கை பார்த்தேன். பூமத்திய ரேகை அருகில் அமைந்த நாடு என்பதால் மழைப் பொழிவு இங்கே அதிகம். விமானம் தரையிறங்கும் போது மிக அருகில் தெரிந்த கரும்பச்சை நிற ரப்பர்தோட்டங்களும், மரங்களும் கண்ணுக்கு அரிதான காட்சி.
ஒவ்வொரு ஊரிலும் மேகங்களின் அமைப்பு வெவ்வேறு மாதிரி இருக்கும் என்பதால் நான் ஜன்னல் இருக்கையை தான் எப்போதும் விரும்புவேன் என்று கூறினார் கோலாலம்பூர் பெண்மணி. அது எந்த அளவு உண்மை என்பது எனக்கு தெரியாவிட்டாலும் ஜன்னல் இருக்கையிலிருந்து கண்ட மேகங்கள் வித்தியாசமாக இருந்தன. என் Google photos account மதியம் 3.40 மணியளவில் தரையிறங்கியதாக கூறுகிறது.
அடுத்த விமானத்திற்கு இரண்டு மணி நேரங்களே இருந்தன என்பதால் கோலாலம்பூர் விமான நிலையத்தை சுற்றி பார்க்க/சாப்பிட நேரமில்லை. விமானத்தில் உணவு தருவார்கள் என்பதால் ஒரு cone ice cream வாங்கி சாப்பிட்டு விட்டு அடுத்த விமானத்தில் ஏறினோம். 5.40 மணியளவில் boarding செய்ய சென்றோம்.
Malaysian Airlines விமானத்தில் Kuala Lumpur - Melbourne மார்க்கத்தில் ஒவ்வொரு பயணிக்கும் நாம் முன் கூட்டியே பதிவு செய்தபடி அவரவர் விருப்பத்திற்கு ஏற்ற உணவு வழங்கப் படுவதில்லை. ஒரு விமானத்திற்கு 25 சைவ உணவு பொட்டலங்கள் மட்டுமே ஏற்றப்படுகின்றன.
முன் வரிசைகளில் அமர்ந்திருந்த, அசைவம் என பதிவு செய்த நம் அன்பர்கள் பலரும் இன்று செவ்வா கெளம, கிருத்திகை என ஏதோ காரணம் சொல்லி சைவ உணவுப் பொட்டலங்களை எடுத்துக் கொண்டு விட பின்னால் அமர்ந்திருந்த சைவ உணவு மட்டுமே உண்ணும் பலருக்கும் உணவில்லாமல் போனது. Tour operator ஒரு பெண்மணி. அவரிடம் முறையிட்டும் எந்த பலனும் இல்லை. அவருக்கே 25 சைவ உணவு மட்டும் தான் என்ற செய்தி தெரியாது என நினைக்கிறேன். திருதிருவென விழித்தார்.
காலை விமானத்தில் சாப்பிட்டதோடு வேறு உணவு இல்லை. பசியான பசி, நாகரிகம் அற்ற நம் மனிதர்கள் மேல் கோபம் என பயணமே பிடிக்காமல் போனது.
விமான பணிப்பெண் எங்கள் மீது பரிதாபப் பட்டு Bun, Fruits, Juice என இரண்டிரண்டாக தந்து சாப்பிட சொன்னார். மீண்டும் வேண்டுமென்றாலும் கேட்டு வாங்கி கொள்ள சொன்னார்.
ஏறக்குறைய 8 மணி நேரப் பயணம். வயிற்றுக்குள் உணவு சென்றதும், பயணத்தை அனுபவிக்க தொடங்கினேன்.
இரவு நேரம் என்பதால் அதிக பாதிப்பு இல்லை. வெளியே இருட்டு , வேடிக்கை பார்க்க அவ்வளவாக எதுவும் இல்லை.விமானத்தில் செல்லும் போது வேடிக்கை பார்க்க என்ன இருக்கிறது என யோசிப்பவர்களுக்கான என் பதில்: பகலில் சூரியனின் கிரணங்கள் வானில் ஏற்படுத்தும் வர்ணஜாலம், வெள்ளை வெளேரென்ற பஞ்சுப் பொதி மேகங்கள், சூரிய உதயம், கீ.....ழே தெரியும் சிறு கிராமங்கள் பெருநகரங்கள், மலைகள், பாலைவனங்கள், நீண்டு நெளிந்து செல்லும் நதிகள், சூரிய ஒளி பட்டு Pink, Aquamarine, நீலம், பச்சை என வெவ்வேறு வண்ணத் தோற்றம் தரும் நீர் நிலைகள், பனி படர்ந்த மலைகள், சில ஊர்களில் தெரியும் Traffic Signal சிவப்பு பச்சை நிற விளக்குகள் மற்றும் வாகனங்கள், தரையிறங்கும் சமயம் தெரியும் இறக்கையின் மேல் நோக்கிய Flap (Landing gear நன்றாக வேலை செய்கிறது பத்திரமாக தரை இறங்கி விடுவோம்), Runways, பெரிய விமான நிலையங்களில் அருகருகே இடிப்பது போல் வந்து இறங்கும் விமானங்கள், இவை தவிர விமானத்தின் முன், கீழ், வால் பகுதிகளில் பொருத்தப் பட்டிருக்கும் காமெராக்களில் தெரியும் காட்சிகள் என ... என்ன இல்லை?
கோலாலம்பூரிலிருந்து கிளம்பிய சிறிது நேரத்தில் பூமத்திய ரேகையைக் கடந்தோம். (இந்திய நேரப்படி இரவு 9.12) இதுவும் ஒரு புது அனுபவமே. இருக்கையின் முன் உள்ள Inflight entertainment TVயில் பார்த்து தெரிந்து கொண்டேன். விமானம் பூமியின் எந்தப் பகுதியில் பறந்து கொண்டிருக்கிறது, சென்று சேர எவ்வளவு நேரம் ஆகும், என்ன வெப்பநிலை போன்ற தகவல்கள் இதில் தெரியும்.
விமானம் ஆஸ்திரேலியாவில் தரையிறங்கும் முன்பாக அந்த நாட்டினைப் பற்றிய சில செய்திகளை அறிந்து கொள்வோம்.
பள்ளி நாட்களில் படித்த ஆஸ்திரேலியா பற்றிய விவரங்களுடன் கூகிள் ஐயனாரின் உதவியையும் பெற்றுக் கொண்டு உங்களுடன் பகிர்கிறேன்.
கண்டம் என்பது மிகப் பெரிய நிலப்பரப்பு. ஆஸ்திரேலியா, நியூசிலாந்து மற்றும் சில தீவுகளை உள்ளடக்கிய இந்த சிறிய கண்டம் பூமிப் பந்தின் தெற்குக் கோளத்தில் அமைந்துள்ளது.
இதில் ஆறு மாநிலங்கள் உள்ளன. Canberra இதன் தலைநகரம். Australian Dollar உபயோகிக்கப் படுகிறது. ஆங்கிலேயர்களின் காலனி ஆதிக்கத்திலிருந்து மீண்ட கண்டம். ஆங்கிலம் பரவலாக பேசப் பட்டாலும் Australian English (Hey Mate! அமெரிக்காவில் Hey Dude!) தான் அதிகம் பேசப்படுகிறது.பிரிட்டிஷ் அரசாங்கம் குற்றவாளிகளை சிறை வைக்க 1700களில் தன்னுடைய காலனிகளில் ஒன்றான வட அமெரிக்காவிற்கு அனுப்பிக் கொண்டிருந்தது. 1770ல் அந்த காலனிகள் United States ஆக மாறியதும் குற்றவாளிகள் கயிறால் கட்டப்பட்டு ஓடாத பழைய கப்பல்களுக்குள் சிறை வைக்கப் பட்டார்கள். சிறு குற்றங்களுக்கு கூட தூக்கு தண்டனை விதிக்கப் பட்டது.
1788 ல் தாமஸ் குக் என்பார் கண்டு பிடித்த மக்கள் தொகை குறைவான நிலப்பகுதிகளில் ஒன்றான ஆஸ்திரேலியாவை பிரிட்டிஷ் அரசாங்கம் கைதிகளை அடைத்து வைக்கத் தேர்ந்தெடுத்தது.
இன்றளவும் பிரிட்டிஷ் காலனியின் அடையாளங்கள் கொண்ட சென்னை, கொல்கத்தா, மும்பை நகர அமைப்புக்களை போலத் தான் ஆஸ்திரேலிய நகரங்களும் உள்ளன. (Tram, கட்டிடங்கள், பழக்க வழக்கங்கள், சட்டங்கள், கூட்டு ரோடுகளில் ரவுண்டானா, இடது பக்க driving)இப்படி குற்றவாளிகளாக வந்து சேர்ந்த பல நாட்டவர்களும் அவர்களின் வாரிசுகளுமாக ஆஸ்திரேலியா குடியேறிகளின் நாடாக இருந்தாலும் அங்கேயும் பல்லாயிரம் ஆண்டுகளாக வாழ்ந்து வரும் பழங்குடியினர் உள்ளனர். அவர்களின் ஆயுதம் நமக்கெல்லாம் நன்கு தெரிந்த Boomerang. இன்றளவும் பழங்குடியினரின் மொழியில் உள்ள வார்த்தைகளை பயன்படுத்தி ஊர்களின் / சாலைகளின் பெயர்கள் உள்ளதை கண்டோம்.
கடற்கரையை ஒட்டிய பகுதிகளிலேயே மக்கள் தொகை அதிகம் உள்ள கண்டம் இது. நடுவில் பாலைவனம், கிழக்கு மற்றும் தென் கிழக்குப் பகுதிகளில் Tropical rain forests,தென் மேற்கில் மலைத் தொடர்கள்(Great dividing range), குளிர் மிகுந்த பகுதிகள், புல்வெளிகள், வட கிழக்கு கடற்கரையில் Great barrier reef எனப்படும் உலகின் மிகப் பெரிய பவழப் பாறைகள் எனப் பலவிதமான நிலை பரப்புக்களை கொண்ட கண்டம் இது.
மழையளவு மிகக் குறைவு, நீர் நிலைகளும் குறைவு என்பதால் தண்ணீருக்கான தட்டுப்பாடு அடிக்கடி ஏற்படுகிறது இங்கே. அரசாங்கமே குறைவான அளவு தண்ணீரை உபயோகிக்க கோரி அறிக்கை விடுகிறது.
இது பற்றிக் குறிப்பிடுகையில் முன்பு ஒரு முறை வெளிநாட்டு சேனல் ஒன்றில் காண நேர்ந்த documentary படத்தை பற்றி பகிர விரும்புகிறேன்.
ஒரு Recreation Vanல் பயணித்துக் கொண்டே தங்கள் இரண்டு சிறு குழந்தைகளுடன் நாடோடிகள் போல பாலைவன ஊர்களில் வாழ்க்கை நடத்தும் ஒரு தம்பதியினரை ஒரு பேட்டியாளர் பேட்டி எடுப்பது போல அமைந்த குறும்படம் அது.
ஆஸ்திரேலியாவில் தண்ணீர் கிடைப்பது அரிது. சிறு Tubல் நீரை நிரப்பி அதிலேயே குழந்தைகளை குளிக்க வைத்து தாங்களும் குளித்து விடுவார்களாம். இது கூட அரிதான நிகழ்வு தான். அந்த நீரை என்ன செய்வீர்கள் என்று பேட்டியாளர் கேட்கிறார். அதற்கு அவர்களின் பதில்: இங்கிருந்து சற்று தொலைவில் ஒரு குடியிருப்பு உள்ளது; இந்த நீரை அங்கே தந்து விடுவோம்; அவர்கள் அதை குடிநீராகப் பயன்படுத்திக் கொள்வார்கள்.
இங்கே தண்ணீர் கிடைப்பதே அரிது. அவர்களுக்கு இது என்ன தண்ணீர் என்று தெரியாது" என்றார்கள் அந்த தம்பதி.பேட்டியாளர் அதிர்ந்து போய் "What?" என்பதுடன் அந்த படம் முடியும்.
தூக்கமும் விழிப்புமாக (பசி) காலை 7 மணியளவில் விக்டோரியா மாநிலத்தின் தலைநகரான Melbourne நகரை சென்றடைந்தோம்.
ஆஸ்திரேலிய விமான நிலையங்களில் பாதுகாப்பு பரிசோதனைகள் அதிகமாக இருந்தன. ஆங்காங்கே காவலர்கள் துப்பறியும் நாய்களுடன் நடமாடிக் கொண்டே இருந்தார்கள்.
ஆஸ்திரேலிய விசா இரண்டு வருடங்களுக்குள் சென்றால் பல முறை சென்று திரும்பும் வகையில் வழங்கப்பட்டிருந்தது. (Multiple entry visa for two years) Paper Visa என ஆரம்பத்தில் குறிப்பிட்டிருந்தேன். அந்தக் காகிதத்தை அதிகாரி வாங்கி பரிசோதிக்கவில்லை. Onlineல் ஏற்கனவே இந்தியாவிலிருந்து எங்கள் விசா பற்றிய விவரங்கள் பதிவேற்றப் பட்டிருந்தன.
குடியுரிமை சோதனை(Immigration) முடிந்து ஒவ்வொருவராக குறிப்பிட்ட இடத்திற்கு சென்று சேர்ந்தோம். இருக்கையில் அமர்ந்த படி கண்ணாடி வழியே தெரிந்த சாலையை வேடிக்கை பார்த்துக் கொண்டிருந்தோம். ஏறக்குறைய ஒரு மணி நேரமாகி விட்டது. எதற்காக காத்திருக்கிறோம் என பொறுமையிழந்து விசாரிக்க ஆரம்பித்தோம்.
ஒரே ஒரு நபர் மட்டும் இன்னும் வந்து சேரவில்லை என்றார்கள். மேலும் 30 நிமிடங்கள் கழிந்த பிறகு அவர் வந்து சேர்ந்தார். தாமதம் ஏன் என விசாரித்தோம். என் மனைவி திருஷ்டிக்காக வைத்திருந்த வேப்பிலையை துப்பறியும் நாய் கண்டு பிடித்து பெட்டி மேல் உட்கார்ந்து விட்டது. பெட்டியை சோதனை செய்து என்னை வெளியில் அனுப்ப இவ்வளவு நேரமாகி விட்டது என்றார்.தடை செய்யப் பட்ட பொருட்களை பெட்டியில் வைத்துக் கொண்டு வராதீர்கள் என பல முறை எச்சரிக்கப் போட்டிருந்தோம்.
அனாவசியமாக தாமதம் ஆனதால் மற்றவர்கள் கடுப்பாகி அவரை திட்ட, ஒரு வழியாக நாங்கள் ஊர் சுற்றி பார்க்க ஏற்பாடு செய்யப்பட்டிருந்த பேருந்தில் ஏறி விமான நிலையத்தை விட்டு வெளியேறினோம்.
விமான நிலையத்திலிருந்து நேராக இந்திய உணவகத்திற்கு சென்று மதிய உணவை உண்டு முடித்து நகரை சுற்றி பார்த்து விட்டு மாலை மூன்று மணியளவில் Albert park என்னும் பிரசித்தி பெற்ற பூங்காவின் எதிரில் அமைந்துள்ள Bay View Eden விடுதிக்கு செல்வதாகத் திட்டம்.ஊர் சுற்றிய பிறகே விடுதிக்கு செல்வோம் என்பதால் விமானத்திலேயே முகம் கழுவி அலங்கரித்துக் கொண்டு தயாராக இருக்க பணிக்கப் பட்டிருந்தோம்.
நகருக்குள் செல்வதற்குள் இந்த நகரினை பற்றிய சில விவரங்களை அறிந்து கொண்டு செல்வோமா ?
1837 ஆம் ஆண்டில் நகரின் 1 * 0.5 கிலோமீட்டர் அளவுள்ள ஒரு பகுதியே தெருக்களாகப் பிரிக்கப் பட்டு Melbourne நகரமாக விளங்கியது. பின்னாளில் மக்கள் வெவ்வேறு நாடுகளிலிருந்தும் இங்கு வந்து குடியேற தொடங்கியதும் நகரம் விரிவடைய தொடங்கியது. இந்தப் பகுதியை Hoddle grid என அழைக்கிறார்கள்.
இதனை ஒட்டி அமைந்துள்ள Flinders Street, Spring Street, La Trobe Street மற்றும் Spencer Street ஆகியவை இதன் எல்லைகளாக அமைந்து இந்தப் பகுதி இன்றைய Central Business District ஆக விளங்குகிறது.
இந்தப் பகுதியை தாண்டி சென்றால் அதை Suburbs என்று குறிப்பிடுகிறார்கள். ரயில், பேருந்து மற்றும் டிராம் ஆகியவற்றால் மிக நன்றாக ஒருங்கிணைக்கப் பட்டுள்ளது இந்த நகரம். CBDயில் ட்ராமில் பயணம் செய்ய கட்டணம் தேவை இல்லை என்று கூறப்பட்டது. Suburbs சென்றால் மட்டுமே கட்டணம். இந்நகரின் பரப்பளவு 9,993 சதுர கிலோமீட்டர்கள் என்று விக்கிபீடியா கூறுகிறது.
நகருக்கு நடுவில் யார்ரா (Yarra) நதி பாய்கிறது. நகரில் எங்கு திரும்பினாலும் பூங்கா தான். பச்சைப் பசேலென்று கண்ணுக்கு குளிர்ச்சியாக உள்ளது.
19ஆம் நூற்றாண்டில் பசிபிக் பெருங்கடல் பகுதியின் வணிக கட்டமைப்பு நகரங்களாக (Commercial network cities) ஆக அறியப்பட்டவை Melbourne, Sydney, Brisbane, Auckland, San Francisco, Seattle மற்றும் Vancouver ஆகிய நகரங்களே.ஆடைகள் மற்றும் காலணிகள் தயாரிப்பிற்குப் புகழ் பெற்ற இந்த நகரம் கட்டிடக் கலையிலும் சிறந்து விளங்குகிறது. கட்டிடக் கலை பற்றி கற்றுத் தரும் பல்கலைக் கழகமும் இங்குள்ளது. உலகின் பல நாட்டவரும் அங்கு சென்று பயில்கிறார்கள். Fashion capital of Australia என இந்த நகரம் அழைக்கப் படுகிறது.
இந்த கண்டத்தின் இயற்கை அமைப்பு காரணமாக pink diamonds மற்றும் opal அபரிமிதமாகக் கிடைக்கிறது. Pink diamonds தற்போது சுரங்கங்களில் மிக அரிதாகத் தான் கிடைக்கிறது.சரி , நகரை சுற்றி பார்க்கலாமா?
எப்போது குளிரும் எப்போது வெயிலடிக்கும் எப்போது மழை வரும் என இந்நகரத்தின் தட்பவெப்ப நிலை ஊகிக்க முடியாதது எனக் கூறி இருந்தார்கள். நாங்கள் சென்ற தினம் லேசான குளிருடன் மிதமான வெயிலுடன் இருந்தது. ஊர் சுற்றுவதில் சிரமம் இருக்கவில்லை.
விமான நிலையத்திற்கு மிக அருகில் பிரம்மாண்டமான Hotel ParkRoyal உள்ளது. அங்கிருந்து விமான நிலையத்திற்கு நடந்தே செல்லும் வகையில் aerobridge இருப்பது இதன் சிறப்பு. இந்த நகரில் அதிக நேரம் Layover இருந்தால் விமான நிலையத்தில் தங்காமல் இந்த விடுதியில் தங்கி செல்கிறார்கள்.
ஆஸ்திரேலியப் பயணத்தில் குறிப்பிட்டுக் கூறும்படியாக உணவு அமையவில்லை. பாதி நேரம் பசியும் பட்டினியும் தான். ஆயினும் ஆங்காங்கே என்ன உணவு வழங்கப்பட்டது என்பதை குறிப்பிடுகிறேன்.
நகரை சுற்றி பார்ப்பதற்கு முன்பு Toddy என்னும் பெயரில் அமைந்துள்ள இந்திய உணவு விடுதிக்கு சென்று மதிய உணவினை உண்டோம். சாம்பார், ரசம், பொரியல், தயிர் என தென்னிந்திய உணவு கிடைத்தது. Toddy என்றால் கள் என பொருள். விடுதியின் ஒரு பகுதியில் உணவுச் சாலை, மறு பகுதியில் Bar என அமைந்திருந்தது. ஐரோப்பிய பயணத்தில் எங்கள் வழிகாட்டி ஒரு பஞ்சாபி, அதனால் பஞ்சாபி உணவகங்கள். ஆஸ்திரேலியாவில் வழிகாட்டி கேரள மாநிலத்தவர் என்பதால் கேரள உணவகங்களில் உணவு ஏற்பாடு செய்யப்பட்டு இருந்தது.
மீண்டும் பேருந்தில் நகர சுற்றுலாப் பயணத்தைத் தொடர்ந்தோம்.
ஆஸ்திரேலியாவின் தலைநகரம் Canberra என்றாலும் அதன் Parliament இந்த நகரின் . Spring வீதியில் தான் அமைந்துள்ளது. அதனருகே இறக்கி விடப்பட்டு வேடிக்கை பார்த்தோம். உள்ளே அழைத்து செல்லவில்லை. அதே Spring வீதியில் Treasury, அதை ஒட்டிய பூங்கா, Parliament பூங்கா என உள்ளன. சிறிது தொலைவு நடந்து வேடிக்கை பார்த்து புகைப்படங்கள் எடுத்துக் கொண்டோம். நகரின் முக்கிய தெருக்களில் இதுவும் ஒன்று என்பதால் போக்குவரத்து அதிகம் இருந்தது. சுற்றுலாப் பயணிகளும் நிறைய தென்பட்டனர்.
வழியில் Immigration Museum, The Princess Theatre (Flinders street) போன்ற பிரபல கட்டிடங்களையும் கண்டோம். (இது Panoramic City Tour தான், வழிகாட்டியின் மொழியில். பேருந்தை விட்டு கீழே இறங்கி பார்க்காமல் இருக்கையில் இருந்த படியே வலது பக்கம் பாருங்கள் உயரமான கட்டிடம் தெரிகிறது, மேலே பாருங்கள் விமானம் பறக்கிறது, இடது பக்கத்தில் பூங்கா தெரிகிறது, அடிவானத்தில் வானவில் தெரிகிறது என்ற ரீதியில் வழி காட்டி மைக்கில் கூற நாம் அவர் என்ன சொல்கிறார் என்பதே புரியாமல், அப்படியே புரிந்தாலும் எதை பார்ப்பது என தெரியாமல் டென்னிஸ் போட்டி umpire போல் கழுத்தை திருப்பி அப்படியும் இப்படியும் பார்ப்பது தான் Panoramic City tour)வழியெங்கும் விதம் விதமான வித்தியாசமான, புதுமையான வடிவங்களில், நிறங்களில் அடுக்கு மாடிக் கட்டிடங்கள் தென் பட்டன. ஒரு இளம் யுவதி அல்லது யுவனைப் பார்ப்பது போன்ற எண்ணமே ஏற்பட்டது. Melbourne நகரம் கட்டிடக் கலைக்கு பெயர் பெற்றது என்று முன்பே குறிப்பிட்டது நினைவிருக்கலாம்.
18ஆம் நூற்றாண்டில் தான் இந்த கண்டம் கண்டுபிடிக்கப் பட்டு மக்கள் ஆக்கிரமிக்க தொடங்கினார்கள் என்பதால் பழமையான கட்டடங்கள் அதிகம் இல்லை. புதுமை தான் எங்கெங்கும்.
வழியில் Yarra நதியின் மேல் அமைந்த பாலங்களும் மிக புதுமையாக வடிவமைக்கப் பட்டுள்ளன. இதன் தென் கிழக்கு கரையோரத்தில் Flinders street அமைந்துள்ளது. இந்நதியின் தெற்கு கரையோரம் Melbourne Arts Precinct எனப்படுகிறது. Centre Melbourne – a performing arts complex – and the National Gallery of Victoria போன்ற கலை தொடர்புடைய கட்டிடங்கள் உள்ளன.இந்த நகரம் பரப்பளவில் சிறியது என்பதால் எங்கள் விடுதியிலிருந்து கிளம்பிய மிக சில நிமிடங்களிலேயே CBD பகுதியை நெருங்கி விட்டோம்.(3 kms) Central Business District என்பது அமெரிக்க நகரின் Downtown போல. நகரின் மையத்தில் அமைந்து முக்கியமான அலுவலகங்கள், கடைகளை கொண்டது. [plazas, bars, and restaurants etc.]
Hoddle Grid ஐ சுற்றிலும் எல்லை போல அமைந்த Flinders Street, Spring Street, La Trobe Street and Spencer Street ஆகியவற்றை சுற்றி வந்தோம். Hoddle Grid இப்போது Melbourne City Centre என அழைக்கப் படுகிறது.
Flinders streetஐ சுற்றி சுற்றி வந்தோம் அங்கிருந்த மூன்று நாட்களும் :). முக்கியமான கட்டிடங்களும் கடைகளும் நிறைந்த வீதி இது. நகரின் முக்கியமான பகுதியில் இது அமைந்திருப்பதால் மூன்று நாட்களும் அந்தப் பகுதியினை கடந்தே தான் செல்ல வேண்டியிருந்தது.
இந்த தெருவில் தான் நகரின் முக்கியமான ரயில் நிலையம் உள்ளது. Dome வடிவ கூரை அமைப்பில் உள்ள இந்த கட்டிடம் நகரின் முக்கியமான சின்னமாக விளங்குகிறது. மெட்ரோ மற்றும் சாதாரண ரயில்கள் கூடும் இடமாக இது உள்ளது.
இது Flinders St & Swanston St ஆகியவை கூடும் இடத்தில் அமைந்துள்ளது. 1854 ஆம் ஆண்டு தொடங்கப்பட்ட இந்த நிலையம் விக்டோரியா மாநிலத்தின் பல பகுதிகளையும் இணைக்கிறது.
என் தோழியின் மகள் அந்த தெருவிலிருந்து ஐந்து நிமிட பயணத்தில் ஒரு அலுவலகத்தில் வேலை செய்து கொண்டிருந்தார். அது பற்றி அவரும் குறிப்பிடவில்லை எனக்கும் எங்கே எப்போது அழைத்து செல்லப் படுவோம் என்று தெரியவில்லை. தகவல் பரிமாற்றம் சரியாக இல்லாத காரணத்தால் அவ்வளவு தொலைவு சென்றும் அவரை சந்திக்க இயலவில்லை. (தொலைவான போது பக்கம் வந்தவள் பக்கம் வந்த போது தொலைவானவள் என்ற திரைப்படப் பாடல் வரிகள் இங்கே சரியாகப் பொருந்தும்)
ஈமெயில், தொலைபேசியில் மிக நேசமுடன் பழகிய மற்றொரு தோழி(?!), உங்கள் ஊருக்கு வந்திருக்கிறேன் என்று தொலை பேசிய போது நான் மூன்று நாட்களும் பிசி என்று கூறினார்.
Flinders தெருவிற்கு சற்றுத் தொலைவில் தான் St.Paul’s Anglican Cathedral அமைந்துள்ளது. Swanson Streetல் அமைந்துள்ள இந்த தேவாலயம் Neo-Gothic முறையில் கட்டப்பட்டது. 1891ம் வருடம் புனித தேவாலயமாக அறிவிக்கப்பட்டது.பேருந்தை சற்று தொலைவில் நிறுத்தி விட்டு எங்களை நடத்தி அழைத்து சென்றார்கள்.
இரட்டைக் கோபுரங்களுடன் விளங்கும் இந்த தேவாலயம் நகரின் குறிப்பிடத் தக்க கட்டடமாக இதன் கட்டிடக் கலைக்கு சான்றாக விளங்குகிறது. Neo-Gothic முறையில் கட்டப்பட்டதால் இதன் உட்பகுதி உயரமாக தோற்றமளிக்கிறது.
[Neo Gothic - The Gothic architectural style is most memorably known for its use of strong vertical lines and ability to create a powerful sense of height. Pointed arches were commonly used to embellish windows and entryways].
1858ல் ஆரம்பிக்கப் பட்டு 1939ல் முடிக்கப் பட்டது ஆஸ்திரேலியாவின் "மிகப் பழமையான தேவாலயம்".இதன் உள்ளமைப்பு வண்ணக் கண்ணாடிகளைக் கொண்டு அமைந்துள்ளது. உள்பக்க நிறம் சற்றே அழுத்தமாக இருந்தது போல தோன்றியது. Brownish ஆக இருந்தது.
[200-300 ஆண்டுகள் தான் இந்தக் கண்டத்தை பொறுத்தவரை பழமை. ஆசியாக் கண்டத்தை பொறுத்த வரை 5,000 ஆண்டுகள் தான் குறைந்த பட்ச பழமையே]
தேவாலயத்தின் உள்ளே மிகப் பெரிய Organ இசைக்கருவி உள்ளது. 1890 ஆம் ஆண்டு T.C. Lewis, Brixton, London என்பவரால் வடிவமைக்கப் பட்டது.
என் கணவர் சென்னை சாந்தோம் சர்ச்சுக்கு சென்றிருக்கிறாயா? அதை விடவா இது பழமையானது,பெரியது,அது, இது என கேள்விகள் கேட்டு நான் உள்ளே வர விரும்பவில்லை என்று கூறிவிட்டார். நான் என் தோழியுடன் உள்ளே சென்று பார்த்து புகைப்படங்கள் எடுத்துக் கொண்டு வந்தேன்.வெளிப்புறத்தில் பச்சை பசேலென்ற தோட்டம், வீதியை அடைய படிக்கட்டுக்கள் என தேவாலயம் அமைந்துள்ளது.
Melbourne விளையாட்டுப் பிரியர்களின் சொர்க்க பூமி என்று சொல்லலாம்.
டென்னிஸ் மற்றும் கிரிக்கெட் விளையாட்டுக்களுக்கு பிரசித்தி பெற்றது இந்த ஊர்.
Australian Open, French Open, Wimbledon (UK) மற்றும் US Open என நான்கு போட்டிகளையும் ஒற்றையர் / இரட்டையர் ஆட்டத்தில் ஒரே வருடத்திற்குள் வென்றால் அவர்/அவர்கள் Grand Slam பட்டம் பெற்றதாக அறிவிக்கப் படுகிறார்/கள். இந்த போட்டிகளைக் நேரில் கண்டு களிக்க உலகெங்கிலிருந்தும் ரசிகர்கள் வருகிறார்கள். [எங்கள் நண்பர் ஒருவர் அமெரிக்காவிலிருந்து தாய் நாட்டிற்கு கூட வராமல் போட்டி சமயத்தில் விடுப்பு எடுத்து கொண்டு டென்னிஸ், கிரிக்கெட் போட்டிகளை ஐரோப்பா, ஆஸ்திரேலியா என சென்று கண்டு களிப்பார்]
ஒவ்வொரு வருடமும் ஜனவரி மாதத்தில் Melbourne Park / Olympic Parkல் இந்த போட்டிகள் நடைபெறுகின்றன. ஒற்றையர், இரட்டையர் என ஆடவருக்கும் பெண்டிருக்கும் தனித் தனிப் போட்டிகள் நடைபெறுகின்றன. பல தரப்பினருக்கும் ஏற்றவகையில் வகையில் போட்டிகள் நடைபெறுகின்றன.Yarra Parkற்கும் "The G" என செல்லமாக ஆஸ்திரேலியர்களால் அழைக்கப்படும் Melbourne Cricket Groundற்கும் இடையில் அமைந்துள்ளது Melbourne park.
Yarra Parkல் எங்களை இறங்கி சென்று Melbourne Parkஐ பார்த்து வர சொன்னார்கள். வெளியிலிருந்து பார்த்தோம். அங்கிருந்து கிளம்பி Swan St பாலத்தைக் கடந்து MCG சென்றோம். எங்களுடன் வந்திருந்த ஆண்கள் திருப்பதி கோவிலை தரிசித்தது போல பரவசப் பட்டார்கள் என்றால் மிகையாகாது .
அதன் வாயிலில் Dennis Lily அவர்களின் உருவ சிலை அருகில் நின்று புகைப்படம் எடுத்துக் கொண்டோம். [யார் இவர் ?!_ பெண்களின் நிலை]
இதன் உள்ளே ஒரு Sports Museum உள்ளது. வழக்கம் போல Museum பக்கம் அழைத்து செல்லவில்லை அமைப்பாளர்கள்.
வழியில் China town தென்பட்டது. Gold Rush எனப்படும் தங்க வேட்டை 1850 களில் விக்டோரியாவில் நடைபெற்றது. அது பற்றி கேள்வி பட்ட சீனர்கள் பெருமளவில் இங்கு வந்து குடியேறியதாக சரித்திரம் கூறுகிறது.இத்தாலி, பிரான்சு, கொரியா, வியட்நாம் ,இந்தியா உட்பட 200 நாடுகளிலிருந்து மக்கள் ஆஸ்திரேலியாவில் குடியேறியுள்ளார்கள். ஒவ்வொரு ஆஸ்திரேலிய நகரத்திலும் ஒரு Chinatown உள்ளது. வெவ்வேறு நாட்டு உணவு விடுதிகளும், உடைகளுக்கான கடைகளும் உள்ளன.
நாங்கள் தங்கிய விடுதி Hotel Bay View Eden மெல்போர்ன் நகரின் பிரசித்தி பெற்ற Albert parkன் நேரெதிரில் அமைந்துள்ளது. [அவர்களுக்கு இது suburb என்பதால் Free tram கிடையாது]
மெல்போர்ன் நகரை பூங்கா நகரம் என்று அழைக்கிறார்கள். எங்கெங்கு காணினும் பூங்காக்கள் தான். குறிப்பாக இந்த பூங்கா Albert Lakeஐ சுற்றி அமைந்துள்ளது. Rowing, Sailing, Diving என பல activities இங்கே நடை பெறுகின்றன. விரும்புபவர்களுக்கு வகுப்புக்களும் எடுக்கப் படுகின்றன.
ஏரியை சுற்றிலும் மக்கள் நடந்து செல்லும் வகையில் நடை பாதை உள்ளது. Cycling events, செல்லப் பிராணிகளுடனான கூட்டம் போன்ற நிகழ்வுகளும் இங்கே நடைபெறுகின்றன. ஆங்காங்கே மக்கள் ஓய்வாக picnic செய்ய ஏற்ற வகையில் ஒன்பது பகுதிகள் உள்ளன.
எல்லாவற்றையும் விட முக்கியமாக இந்த ஏரியை சுற்றிய சாலையில் தான் Australian Grand Prix என்னும் Formula One Car Race நடைபெறுகிறது.
காதல் தேசம் என்ற திரைப்படத்தில் மெல்போர்ன் நகரின் பூங்காக்களை மிக அழகாகப் படம் பிடித்து காட்டி இருப்பார்கள். நான் அவைகளை நேரில் பார்ப்பேன் என்று கனவிலும் எண்ணியதில்லை.
விடுதிக்கு செல்வதற்கு முன்பாக பல சிறப்புக்களை கொண்ட இப்படிப்பட்ட ஒரு இடத்திற்கு அழைத்து செல்லுங்கள் என்று Tour Managerஐ நான் வேண்டிக் கொண்டதன் பேரில் அதன் வாயிலில் எங்கள் பேருந்தை நிறுத்தினார்கள்.
அச்சமயம் மதியம் நான்கு மணி இருக்கும். முதல் நாள் முழுவதும் பயணம் ,காலையிலிருந்து உட்காராமல் சுற்றிய அசதி என அனைவருக்கும் அலுப்பான நேரம்.
என்னை தவிர மற்ற அனைவரும் ஹூம் ... இந்த lakeஐ பார்க்கவா இங்கே அழைத்து வந்தீர்கள்; இது போல பல ஏரிகளை பார்த்து விட்டோம்; போதும் விடுதிக்கு போய் ஓய்வெடுக்கலாம் வாருங்கள் என்று கூக்குரலிட்டதும் நேராக விடுதியில் வாசலில் இறக்கி விடப்பட்டோம். இரவு உணவிற்கு மீண்டும் Toddy சென்று திரும்பினோம்.
நாங்கள் சென்ற ஆஸ்திரேலிய நகரங்கள் ஒவ்வொன்றிலும் மிகப் உயரமான கட்டிடம் Sky view deck உடன் அமைக்கப் பட்டு மேலடுக்கிலிருந்து ஊரை காணும் வண்ணம் அமைந்திருந்தது. இரவில் வண்ண விளக்குடன் அந்த sky deck தெரிந்தது.Southern hemisphereலேயே மிக உயரமான கட்டிடம்/அகலமான பூங்கா /அதிசயமான மிருகம் என ஆங்காங்கே விளம்பரம் செய்திருந்தார்கள். Southern hemisphereல் இருப்பதே ஒரு கண்டம் தான். ;) இதை விட்டால் அண்டார்டிகா தான்.
மறுநாள் காலை 11 மணியளவில் தான் ஊர் சுற்றி பார்க்க கிளம்புவோம். 6 - 7 மணிக்குள் காலை உணவு. சாப்பிட்டு ஓய்வெடுத்துக் கொண்டு தயாராக இருங்கள் என்று கூறி சென்றார் எங்கள் வழிகாட்டி. இம்முறை Tour Manager ஒரு பெண்மணி அவருக்கு உதவியாக ஒரு இளைஞர்.
இளைஞர் ஆஸ்திரேலியாவிற்கு வருவது முதல் முறை என்பதால் எங்களை கண்டு கொள்ளவுமில்லை வழி நடத்தவுமில்லை; வளைத்து வளைத்து புகைப்படம் எடுத்தார்; மற்றவர்களிடம் தன்னை வைத்து புகைப்படம் எடுத்து தர சொன்னார். இவருக்கு ஊரைப் பற்றியோ நாங்கள் சென்ற இடங்களை பற்றியோ எதுவும் தெரியவில்லை. மேனேஜர் பெண்மணி யாருக்கோ என்னவோ நடக்கிறது என்பது போல உடன் பயணித்தார்.
எங்களுக்கு எப்போதும் போல கூகிள் ஐயனாரே துணை.ஆஸ்திரேலிய பயணத்தின் முதல் நாளை முடித்த அசதியில் விடுதி அறைக்கு சென்று, WIFI தொடர்பு ஏற்படுத்தி, (யாரும் எங்கள் தகவலுக்காக காத்திருக்கவில்லை என்றாலும்) தகவல்களை பகிர்ந்து கொண்டு, மறுநாள் செல்லப் போகும் இடங்களை பற்றிய தகவல்களை கூகிளில் தேடி படித்து விட்டு, மீண்டும் காலை சீக்கிரம் கண் விழிக்க வேண்டுமே என்ற கவலையுடன் உறங்கினோம்.
அனுபவங்கள் தொடரும்...
