எங்கே தேடுவேன்??

 

ஏழாவது அமெரிக்கப் பயணம் காலம்.

பீனிக்ஸ் நகரில் மகனது இல்லத்தில் தங்கியிருந்து விட்டு ஏப்ரல் 10 ஆம் தேதி மீண்டும் கலிபோர்னியாவிலுள்ள மகள் வீட்டிற்குச் செல்ல எண்ணியிருந்த ஒரு நாளின் (24-மார்ச்-2025) மாலை நான்கு மணியளவில் மகளின் தொலைபேசி வந்தது. உடனடியாக என் உதவி தேவைப்படுவதால் மறுநாளே கிளம்பி வர முடியுமா எனத் தொலைபேசியில் கேட்டார்.

உடல்நிலை சரியில்லையா இல்லை வேறு காரணமா எனக் கவலையுடன் யோசித்துக் கொண்டே கலிபோர்னியாவிற்கு மறுநாள் காலை 8.30 மணி விமானத்தில் கிளம்ப முடிவு செய்தோம். அவசர கதியில் எங்கள் பொருட்களைப் பெட்டிகளில் அடுக்கி வைத்து விட்டுக் கடைக்கு சென்று தேவையான சில பொருட்களை வாங்கிக் கொண்டு இரவு உறங்கச் சென்றோம். குட்டிப் பேரன் பெட்டிகளைக் கண்டதும் என்ன புரிந்து கொண்டாரோ தெரியவில்லை, எங்களை விட்டு நகரவே இல்லை.

மறுநாள் அனைவரும் அதிகாலை 5 மணிக்கே கண் விழித்துக் கிளம்பத் தயாரானோம். மருமகள் சமைத்துத் தந்த பொங்கல் (+சட்னி) டப்பாக்களை ஒரு பிளாஸ்டிக் பையில் சுற்றி Trader Joe’s காகிதப் பையில் வைத்து எடுத்துக் கொண்டு 6.40 மணியளவில் விமான நிலையத்திற்குக் கிளம்பினோம். மகனின் காரில் மூன்று பெரிய பெட்டிகளை வைக்க இயலாது என்பதால் அவரது நண்பரின் உதவியை நாடியதால் 15 நிமிடங்கள் தாமதம் வேறு. (Are you awake, have you brushed your teeth, have you started, where are you)

வீட்டிலிருந்து விமான நிலையம் 20 நிமிடப் பயண நேரத்தில் உள்ளதால் 8.40 விமானத்திற்கு சரியான நேரத்திற்குச் சென்று விடலாம் என்று நாங்கள் நினைத்திருக்க, விமான நிலைய பார்க்கிங்கை நெருங்க முடியாத வண்ணம் போக்குவரத்து நெரிசல். நண்பரும் வந்து சேர நாங்கள் செல்ல வேண்டிய கதவிற்கு சற்று முன்பாக மகன் எங்களை இறக்கி விட்டு விட்டு, அம்மா நான் காரை நிறுத்தி விட்டு வந்து உங்களைப் மீண்டும் சந்திக்க முடியுமா என்று தெரியவில்லை என கூறி கட்டி அணைத்துப் பிரியாவிடை பெற்றுக் கொண்டு கிளம்பினார்.

அப்போது மணி 7.30. மிக வேகமாகப் பெட்டிகளை இழுத்துக் கொண்டு செல்கையில் “டப்” என சத்தம். சாப்பாடு எடுத்துச் சென்ற காகிதப் பையின் பிடி அறுந்தது…(காகிதப் பையை எடுத்து வந்ததற்காகப் பெற்ற அர்ச்சனைகள் தனிக் கதை, யாரிடமிருந்து என்பது உங்களுக்கே தெரியும்) ஒரு பெட்டி மேல் பேரன் மற்றதில் சாப்பாட்டு மூட்டை என வைத்துக் தள்ளிச் சென்று மிக நீண்ட Southwest Airlines விமான check-in வரிசையில் சேர்ந்து கொண்டோம். எங்கள் பாஸ்போர்ட்டுகளை வாங்கிக் கொண்டு சென்ற எங்கள் மருமகள் பெட்டிகளுக்கான tagsகளை எடுத்து வர வரிசையில் நகர்ந்தபடியே அவைகளைப் பெட்டிகளில் பொருத்தினோம். இதற்குள் மகனும் வந்து சேர்ந்து கொள்ள மூன்று பெரிய பெட்டிகள் ஒரு கைப்பெட்டி என நான்கு பெட்டிகளையும் check-in செய்தோம்.

கையில் எடுத்துச் செல்லக் கூடிய பெட்டியையும் check-in செய்ய இரண்டு காரணங்கள். 1. பயண நேரம் 1.30 மணி நேரம் மட்டுமே 2. Southwest airlines விமானங்களில் முன்பதிவு இருக்கைகள் கிடையாது. Mofussil பேருந்து போல உள்ளே ஏறி கிடைத்த இடத்தில் அமர வேண்டும். என் கணவரிடம் laptop பையும் என்னிட்ம் ஒரு சிறிய Michael Kors கைப்பை (அதில் பாஸ்போர்ட்டுகள், 20$, tissue paper, கைபேசி) மற்றும் பொங்கல் பை, காலி குடிநீர் பாட்டில். மட்டுமே.

மகன் குடும்பத்தினரிடம் பிரியாவிடை பெற்றுக் கொண்டு security check செய்யச் சென்ற போது நேரம் 8.15. வரிசையில் நகர்ந்து கதவருகில் நுழையும் போது என் கைப்பையிலிருந்த பாஸ்போர்ட்டுகளை எடுத்து அவற்றின் முன்பக்கத்தைப் பார்த்ததும் அதிர்ந்து போனேன் (expire ஆனவை) புது பாஸ்போர்ட்டுகளைக் காணவில்லை. என் கணவரிடம் கூறிவிட்டு வரிசையை விட்டு வெளியில் மிக வேகமாக வந்து மகனிடம் கூறினோம்.

டிசம்பர் கடைசி வாரத்தில் உல்லாசக் கப்பல் பயணம் சென்ற போது பழைய பாஸ்போர்ட்டுகளை தனியாக வைத்து விட்டு (சேர்த்து எடுத்துச் செல்வதால் verification சமயத்தில் குழப்பம் ஏற்படுகிறது) புதியவற்றை மட்டும் எடுத்துச் சென்றோம். மகனிடம் கொடுத்து வைத்திருந்த பழைய பாஸ்போர்ட்டுகளை முதல் நாளிரவு என் கணவர் தந்த போது (இருவரும் கவனிக்கவில்லை) வாங்கி என் கைப்பையில் வைத்துக் கொண்டேன். புது பாஸ்போர்ட்டுகள் என் Roll on பெட்டியின் உள்பகுதியில் இருந்தன என்பதை நான் கூறவும் மகனும் மருமகளும் check-in பகுதிக்குச் சென்று பெட்டியை எடுக்க முடியுமா என்று விசாரித்தனர். பொதுவாக அது சாத்தியமில்லை என்று அங்கிருந்த ஊழியர் கூறி, செக்யூரிட்டி அலுவலரை அணுகுமாறு கூறினார்.

செக்யூரிட்டி பகுதிக்குச் சென்று எங்கள் பிரச்சினையை எடுத்துக் கூற, அலுவலர் பழைய பாஸ்போர்ட் expire ஆகி ஒரு வருடத்திற்குள் இருந்தால் அனுமதிக்க முடியும் உங்களுடையது 2018லேயே expire ஆகி விட்டது வரிசையை விட்டு ஒதுங்கி நில்லுங்கள், let us see what we can do எனக் கூறினார். பல நிமிடக் காத்திருப்புக்குப் பிறகு ஒரு பெண் அலுவலர் வந்தார். என்ன பிரச்சினை என விசாரித்து விட்டு மிக நிதானமாக கைகளுக்கு கிளவுஸ் மாட்டிக் கொண்டு எங்கள் பாஸ்போர்டை கையில் வாங்கிப் பார்த்து விட்டு ஒரு formஐக் கொடுத்து எங்கள் பெயர், முகவரி என சில அடிப்படைத் தகவல்களை எழுதச் சொன்னார். பிறகு அவரது மேலதிகாரியைத் தொடர்பு கொண்டு பேசினார். இடையில் பேரனுக்குப் பசிக்க ஆரம்பிக்க அந்தப் பகுதியை சுற்றிச் சுற்றி ஓட ஆரம்பித்தார். மம்மு வேணும் என சிணுங்கினார். (அடுத்த பசி நேரத்திற்குள் வீட்டிற்குச் சென்று விடலாம் என்பதால் கையில் உணவு எடுத்து வரவில்லை)  

அந்தப் பெண் அதிகாரி மகனிடம் நான் இப்போது எங்கள் அலுவலகத்திற்குத் தொலைபேசப் போகிறேன் அவர்கள் கேட்கும் கேள்விகளுக்கு இவர்கள் சரியாக பதில் கூறினால் நாங்கள் இவர்களை பயணம் செய்ய அனுமதிப்போம்; நீங்கள் யாரும் உதவக் கூடாது பரஸ்பரம் இவர்கள் இருவரும் உதவிக் கொள்ளக் கூடாது; தொலைபேசிக்கு அனுமதி இல்லை எனக் கூறினார்.  என் தாயாருக்கு தொலைபேசுவதில் உதவி தேவைப்படலாம் என மகன் கூறியபோது strictly No, she has to manage எனக் கூறினார். நாற்காலி தேவைப்படுகிறதா என அந்தப் பெண்மணி அன்பாக விசாரித்தார். இருந்த டென்ஷனில் வேண்டாம் என மறுத்து விட்டேன். மற்றொரு அலுவலரும் வந்து சேர்ந்து கொண்டதும் அவருக்கும் தகவல்களைப் பகிர்ந்தார். அலுவலகத்திற்கு தொலைபேசினார்கள். யாரும் பதிலளிக்கவில்லை. காத்திருந்தோம். பல நிமிடங்களில் என் கணவருக்கான அலுவலரும் வந்து சேர்ந்து கொண்டார். எனக்கான அலுவலர் மகனை அழைத்து one stop flight, Los Angeles அருகிலுள்ள Santa Ana வழியாகச் செல்லும் அடுத்த விமானத்திற்கு டிக்கெட்டுகளை மாற்றச் சொன்னார்.

இடையில் தொலைபேசித் தொடர்பு கிடைத்ததும் அவர் இங்கு நடக்கும் தகவல்களைக் கூறத் தொடங்கினார். மறுமுனையில் கேள்விகள் கேட்கப்பட அலுவலர் என்னிடம் கேள்விகளைக் கேட்டுத் தொலைபேசியில் என் பதிலை relay செய்தார். ஆங்கிலத்தில் நடந்த உரையாடலை கீழே தொகுத்துள்ளேன்.

What is your date of birth?

What is your place of birth? – Kumbakonam

Where is it? – It’s a small town in the southern part of India

Can you name any city nearby that place? – Sure, Chennai

How long have you been staying in the address given in the form? – Since January

When did you come to the US? – Dec 4, 2024

Where were you staying before this address? – _______, __________

What is the address? – Replied partly (my husband helped with the door number, but the officer told not to help each other. I tried to use my phone but she told me to put it down)

What is the zip code? – I don’t know (over phone – she says she doesn’t know)

What is your email? Can you write it for me? - yes, sure

Tell me the last four digits of your telephone number? ----(இந்திய எண்ணா அமெரிக்க எண்ணா? இந்திய எண்ணைக் கூறினேன். அமெரிக்க எண் நினைவில் இல்லை)

Last four digits of the second telephone number? ----(கணவரின் இந்திய எண்)

What is your new passport number? – I don’t know. Everything is digitalized. I have it in my phone. Can I look into it?

Put down your phone. If you don’t remember no problem. (over phone- she says she doesn’t know)

சில நிமிடங்களுக்குப் பிறகு you are cleared to go எனக் கூறினார். அதற்குப் பொருள் “புருசன் கூடவே நிற்காதே பின்னால் நகர்ந்து போ. மறக்காமல் பழைய passportகளை எடுத்துக் கொள்”

மகன் குடும்பத்தார் என்ன செய்வது எப்படி உதவுவது எனப் புரியாமல் நின்றிருக்க, அருகில் இருந்த கடையில் பால், வாழைப் பழங்கள் என வாங்கி வந்து குட்டிப் பேரனுக்குத் தந்து விட்டு எனக்கும் தந்தார்கள். பழங்களை வாங்கிப் பையில் வைத்துக் கொண்டேன். பல நிமிடங்கள் கடந்தும் என் கணவருக்கு clearance கிடைக்கவில்லை. காரணம் எங்களுக்கே தெரியும். பாஸ்போர்டில் உள்ள அவரது முழுப்பெயர் கணினியில் அவ்வளவு சுலபத்தில் தெரியாது. முதல் 16 எழுத்துக்கள் மட்டுமே தெரியும். What is your first name, second name, middle name என ஆரம்பித்து 1,2,3 என்ற வரிசையில் தேடி பிறகு 3,2,1 எனத் தேடி…அவருக்கே மறந்து போன பழைய yahoo mail id யைத் தேடி… ஒரு வழியாக 9.15க்கு அவரையும் அனுப்பினார்கள்.

மணி 9.20.

குடும்பத்தினரிடம் சொல்லிக் கொண்டு உள்பக்கமாக வாருங்கள் எனக் கூறினார்கள். இந்த விமானம் one stop விமானம். அம்மா…இரண்டு boarding pass உள்ளன. இந்த விமானமே நேராக Oakland செல்லுமா அல்லது இறங்கி வேறு விமானத்தில் ஏற வேண்டுமா என விசாரித்துக் கொள்ளுங்கள் என மகன் கூறினார். சரி, அந்த emailஐ எனக்கு அனுப்பு எனக் கூறிவிட்டு உள்ளே சென்றதும் எங்கள் இருவருக்கு மட்டும் தனி வரிசை. எங்கள் ஸ்வெட்டர்கள், ஷூக்கள், கைப்பை, பிடி அறுந்த காகிதப் பைக்குள் பிளாஸ்டிக் பையில் சுருட்டி வைக்கப் பட்டிருந்த பொங்கல் + ஊறுகாய், கசகசவென்று இருந்த வாழைப்பழங்கள் அடங்கிய சாப்பாடு மூட்டை, laptop, belt என ஒவ்வொன்றாக scanning machine ஒன்றில் வைத்து சோதித்து விட்டு ஒரு காகிகத்தில் மருந்தினை ஒற்றி drug test செய்து ஒவ்வொரு பொருளாக வெளியில் எடுத்துத் தந்தார்கள்.

அணிந்து கொண்டதும் எந்த gate எனத் தெரியுமா என விசாரித்து எங்களுக்குத் தெரியும் எனக் கூறியதும் நேரே அங்கே செல்லுங்கள் இனிமேல் தொலைபேசியில் இருக்கும் boarding pass மட்டும் போதும்.  இடையில் விமானம் மாறும் போதும் security பகுதியை விட்டு எங்கும் செல்லாதீர்கள் நேராக gate செல்லுங்கள் எனக் கூறி அனுப்பினார்கள். அவர்களுக்கு நன்றி கூறி விட்டு கிளம்பிய சமயம் நான் உள்ளே அணிந்திருந்த சட்டையின் பின் பக்க ஊக்கு அறுந்து போனது. நின்று safety pin போட வசதி இல்லை. சாப்பாட்டு மூட்டையை கையில் இடுக்கிக் கொண்டு ஓட்டமும் நடையுமாகக் கிளம்பினோம்.

Gateஐ அடையும் நேரம் ஏற்கனவே boarding ஆரம்பித்து விட்டதால் வரிசையில் சேர்ந்து ஒரு வழியாக விமானத்தில் ஏறினோம். வழக்கம் போல முதலில் ஏறியவர்கள் ஜன்னல் அல்லது ஓர இருக்கைகளைப் பிடித்துக் கொண்டு விட்டார்கள். நடு இருக்கைகள் மட்டும் காலியாக இருந்தன. இறக்கை அருகில் ஒரு இருக்கையில் ஜன்னல், நடு இருக்கைகள் காலியாக இருக்கவே அங்கு அமர்ந்தோம். என் கைபேசி 68% சார்ஜ் இருப்பதாகக் காட்டியது. விமானத்தில் இலவச WiFi இருந்தாலும் மதியம் 1.30 மணிக்கு Oaklandல் இறங்கி மருமகனைத் தொடர்பு கொள்ளும் வரை தொலைபேசி உயிரோடு இருக்க வேண்டும் என்பதால் சிக்கனமாக செலவு செய்ய வேண்டிய கட்டாயம். (charger கைப்பெட்டியோடு முன் விமானத்தில்) 9.40க்கு விமானம் கிளம்பும் சமயம் மகனது WhatsApp தகவல்கள்.  After reach la cal us. அதைத் தொடர்ந்து San Antonio. Santa Ana என்று சொன்னாரே என யோசனை உதித்தாலும் அவர் சொன்னால் சரியாகத் தான் இருக்கும் என முடிவு செய்தேன்.

விமானம் கிளம்பி உயரே பறக்கத் தொடங்கி, நிதானத்திற்கு வந்த பிறகு எதிர்பாராமல் மூன்று வாரங்களுக்கு முன்பாகவே குட்டிப் பேரனை விட்டுக் கிளம்பிய அதிர்ச்சியை உணர ஆரம்பித்தோம். கண்ணீர் பெருகியது. விமானம் சாலையில் வாகனங்கள் U-turn எடுப்பது போல 3-4 முறை வளைந்து வளைந்து சென்றது (இறக்கை அருகே எங்கள் இருக்கை என்பதால் வளைந்து செல்வது தெரிந்தது) அதிகாலையில் பால் குடித்த பிறகு எதுவும் சாப்பிடாமல் டென்ஷனில் இருந்ததன் பலனாக தலை சுற்றலுடன் வாந்தி வருவது போல உணரத் தொடங்கினேன். Seat belt sign அணைக்கப்பட்டால் தான் குடிக்க தண்ணீராவது தருவார்கள் என்பதால் காத்திருந்தேன்.

பல நிமிடங்களுக்குப் பிறகு விமானப் பணிப்பெண் ஒருவர் கையில் இருக்கை எண்களுடன் கூடிய ஒரு தாளில் ஒவ்வொரு பயணியாக உங்களுக்குக் குடிக்க என்ன வேண்டும் எனக் கேட்டுக் குறித்துக் கொண்டே வந்தார். இருக்கையின் முன் பகுதியில் வைக்கப் பட்டிருந்த பட்டியலில் on the house என்னும் பிரிவின் கீழ் உள்ளவற்றில் ஒன்றைத் தேர்ந்தெடுத்து ஒவ்வொரு பயணியும் சொல்லச் சொல்ல குறித்துக் கொண்டே வந்தார். (சோடாக்கள், கோக், காப்பி, டீ, ஹாட் சாக்லேட், பீர்) எங்கள் இருக்கைக்கு முன் இருக்கை வரை அது தொடர்ந்தது.

மிகச் சரியாக எங்கள் வரிசைக்கு வந்ததும் சாரி இதோ வருகிறேன் எனக் கூறி விட்டுச் சென்றவர் பத்து நிமிடங்களுக்குப் பிறகு வந்து சேர்ந்தார். தற்சமயம் அவர் கையில் tablet. அதில் மற்றவர்களுக்கான பானங்களைக் குறித்துக் கொண்டார். தலை சுற்றல் அதிகரிக்கத் தொடங்கியது. கையில் குடிநீர் பாட்டில் இருந்தாலும் செக்யூரிட்டி பகுதிக்குப் பிறகு தண்ணீர் பிடிக்க நேரமில்லை. மது வகைகள், சேண்ட்விச் போன்றவைகளை விலைக்கு வாங்கும் வசதி இருந்தும் 1.30 மணி நேரப் பயணம் என்பதால் பயணிகள் யாரும் வாங்கியது போலத் தெரியவில்லை (பணிப்பெண் கையில் credit card swiping machine இல்லை)

சில நிமிடங்களுக்குப் பிறகு ஒரு சிறிய trayல் பானங்களை முதல் இருக்கை தொடங்கி எடுத்து வந்து தருவதற்குள் மயக்கமே வந்து விட்டது. ஒரு வழியாக ஹாட் சாக்லேட்டைக் குடித்து முடித்து பொங்கல் பையைத் திறக்க ஒரு ஊறுகாய் டப்பா மூடி திறந்து வழிந்து கொண்டிருந்தது. கைபையில் கிடைத்த கைதுடைக்கும் காகிதத்தைப் பயன்படுத்தி ஒரு மாதிரி சமாளித்து பொங்கல் மற்றும் வாழைப்பழத்தை உண்டு முடித்ததும் போன உயிர் மீண்டது. சில நிமிடங்களில் உள்ளே சென்ற ஹாட் சாக்லேட் வயிற்றைக் குழப்ப…மீண்டும் வாந்தி வருவது போன்ற உணர்வும் தலை சுற்றலும்…

மகள் எதற்காக அவசரமாக வரச் சொல்கிறார் என்ற கவலையும் உடன் தொற்றிக் கொள்ள, விமானம் தரையிறங்கும் நேரம் நெருங்கியது. ஜன்னலின் வழியே தெரிந்த மலைத் தொடர்களின் மேலே பனி படர்ந்திருந்ததைக் காண முடிந்தது. San Antinio நகருக்கு நடுவில் அதே பெயருடைய ஒரு நதி உள்ளது. அந்த நதியின் கரையில் நடந்து செல்வதும் (Riverwalk) விழாக் காலங்களில் வண்ண விளக்குகள் ஏற்றப்படுவதும் பிரசித்தம். (holiday lighting) என் கணவர் பல வருடங்களுக்கு முன்பு அந்த ஊருக்குச் சென்றுள்ளதால் நகரின் நடுவே நதி தெரிகிறதா என்று பார்த்துச் சொல் எனக் கூறினார். அருகில் அமர்ந்திருப்பவர்களுக்கு நாம் பேசும் மொழி புரியாதது ஒரு வகையில் வசதி. 😊

ஜன்னல் வழியாக எத்தனை எட்டிப் பார்த்தாலும் நதி எதுவும் தெரியவில்லை. சிறு குளங்கள் இரண்டு தெரிந்தன. விமானம் வேறு runwayயில் இறங்கினால் நதி தென்பட வாய்ப்பில்லை என சமாதானம் கூறிக் கொண்டோம். விமான நிலையத்தை நெருங்கும் சமயம் நிறைய சிறு சிறு விமானங்கள் (தனியார்) ஆங்காங்கே நிறுத்தப்பட்டும், ரன்வேயில் சில தரையிறங்கிக் கொண்டும் ஏறிக் கொண்டுமிருந்தன. குறிப்பாகச் சொல்லப் போனால் பெரிய விமானகளை விட சிறு விமானங்களே அங்கு அதிகம் தென்பட்டன.

San Antinio சிறிய விமான நிலையம் தான் விமானத்தை விட்டு இறங்கியதும் அடுத்து ஏற வேண்டிய விமானத்தை சீக்கிரமாக அடைந்து விடலாம் என என் கணவர் கூறினார். தரையிறங்கியதும் மகனுக்குத் தொலைபேசிய போது எங்கள் பாஸ்போர்ட் அதிக நேரம் ஆளில்லாமல் பெட்டியில் இருப்பது நல்லதில்லை என்பதால் ஏற்கனவே மருமகன் ஓக்லாண்ட் விமான நிலையத்திற்குக் கிளம்பிச் சென்று விட்டார் எனக் கூறினார். அதற்குள் மருமகனிடமிருந்து WhatsApp தகவல்.: Luggage tagsகளை புகைப்படம் எடுத்து அனுப்புங்கள். 

உள்ளே நுழைந்ததும் Welcome to Orange County எனத் தரையிலும் சுவர்களிலும் தென்பட்டது. Gate 20ல் இறங்கியதும் அங்கிருந்த உதவியாளரை விசாரித்ததில் Gate21ல் தான் எங்களது அடுத்த விமானம் எனத் தெரிந்ததும் Phoenix security அலுவலர் கூறியிருந்த படி எங்கும் வேடிக்கை பார்க்காமல் பத்தே எட்டில்(மிக அருகில்) அங்கே சென்றடைந்தோம். Luggage tagsகளை புகைப்படம் எடுத்து அனுப்பிய சில நிமிடங்களில் பாஸ்போர்ட் எந்தப் பெட்டியில் உள்ளது? நான் பதிலனுப்பிய சில நிமிடங்களில் அவற்றின் புகைப்படங்களை அனுப்பினார். மிகச் சிறிய இந்த விமான நிலையதில் ABC என மூன்று terminalகளும் ஒரே கட்டிடத்தில் (A 1-8, B 9-15, C 16-22) உள்ளன. 

கடவுளுக்கு நன்றி கூறி விட்டு அருகிலிருந்த restroomஐப் பயன்படுத்தி விட்டு (இப்போதும் தண்ணீர் பிடிக்க மறந்து விட்டு) இருக்கையில் அமர்ந்தோம். அப்போது நேரம் 11.20. அடுத்த விமானம் 12.30க்கு தான் என்பதால் San Antinioவின் நேரத்தை கூகிள் செய்தேன். டெக்ஸாஸ் மாநிலம் பரப்பளவில் மிகப் பெரியது என்பதால் இரண்டு time zoneகள் உண்டு தற்போது நேரம் 1.30 எனக் கூறினார் கூகிள் ஐயனார். நாம் சரியான ஊரில் சரியான நேரத்தில்தான் இருக்கிறோமா என சந்தேகம் தோன்றவே Gate 21 சென்று விசாரித்து வந்தார் என் கணவர். உள்ளே சென்று அமர்ந்ததும் பிள்ளைகளுக்குத் தகவல் அனுப்பி விட்டு விமானம் பறக்கக் காத்திருந்தோம். காத்திருந்த சமயத்தில் காவலர்கள் சிலரும் அவர்களின் மோப்ப நாயும் Gate 21 அருகிலிருந்த பயணிகளை 4-5 முறை சுற்றிச் சுற்றி வந்தனர். இருக்கும் பிரச்சினையில் இது வேறு சேர்ந்து கொண்டது.எல்லாம் சரியாக உள்ளது என்ற நிம்மதியுடன் அமர்ந்திருந்த சில நிமிடங்களில் boarding ஆரம்பித்தது.

விமானத்தில் ஏறி இடம் பிடித்ததும் விமானியின் அறிவிப்பு. யாரோ(?!) ஒரு பயணி Gate 21ல் பதிவு செய்து விட்டு விமானத்தில் ஏறவில்லை. அவர் பெயர் தெரியவில்லை. எனவே பயணியர் அனைவரும் அவரவர் ID மற்றும் Boarding passகளைத் தயாராகக் கையில் வைத்துக் கொள்ளவும் எனக் கூறினார். அதே நேரம் விமான நிலைய ஊழியர் ஒருவர் முன் வரிசை இருக்கைகளில் சோதனை செய்ய ஆரம்பித்தார். நான் என் கணவரிடம் உங்கள் பெயரைத் தான் தெரியவில்லை என்று விமானி கூறினாரோ இப்போது ID கேட்டால் முதலிலிருந்து ஆரம்பிப்பார்களே, முதல் வேலையாக விமானத்தை விட்டு இறக்கி விடுவார்களே என நான் பதற, சிறிது நேரம் அமைதியாக இரு என்ன நடக்கிறது எனப் பார்ப்போம் என்றார். முதல் இரண்டு வரிசைகளில் சோதனை முடிந்த நேரம் 30+ மதிக்கத்தக்க ஒரு ஆண் எங்களைக் கடந்து சென்றார். விமானி தேடிய பயணி ஏறி விட்டார். விமானம் தற்போது கிளம்பும் என அறிவித்ததும் அப்பாடா எனப் பெருமூச்சு விட்டேன்.(டோம்)

விமானம் ரன்வேயில் காத்திருந்த சமயத்தில் கண்ட சில காட்சிகளை இங்கே கூறுகிறேன். இங்கு மொத்தம் இரண்டு ரன்வேக்கள் மட்டுமே உள்ளன. ஒன்று சிறு விமானங்களுக்கு மற்றது சற்றே பெரிய (எங்களுடைய விமானம் போல commercial விமானம்) விமானங்களுக்கானது. சிறு விமானங்கள் என நான் கூறுவது 2-10 இருக்கைகள் உடையவை. 2 இருக்கை விமானங்கள் ஒரு taxiway 10 இருக்கை விமானங்கள் மற்றொரு taxiway எனப் பயணித்து தங்களுக்கான ரன்வேயை அடைந்து பறக்கத் தொடங்கின. எங்கள் விமானம் கடைசி ஓடுபாதையில்… விமான நிலையத்தில் காத்திருந்த நேரத்தில் Air Canada விமானங்கள் பல ஏறி இறங்குவதைக் காண முடிந்தது. (தினசரி சேவை கனடா நாட்டிற்கு இங்கிருந்து உண்டு) இந்த விமான நிலையம் பயிற்சிப் பள்ளி விமானங்கள், தனியார் விமானங்கள் மற்றும் general traffic விமானங்களை ஊக்குவிப்பதாக கூகிள் ஐயனார் கூறுகிறார்.

நிற்க.

விமானம் சீராகப் பறக்கத் தொடங்கியது. மீண்டும் வயிற்றுக் குழப்பம் வருவதைத் தடுக்க இம்முறை Coke குடிக்க முடிவு செய்தோம். Pretzel உடன் ஒரு டம்ளரில் நிறைய ஐஸ் கட்டிகளுடன் தரப்பட்ட Cokeஐக் குடித்து முடித்த சில நிமிடங்களில் ஓக்லாண்ட் விமான நிலையத்தில் தரையிறங்கப் போகிறோம் என்ற அறிவிப்பு. கீழே மிகவும் பரிச்சயமான Bay bridge, San Mateo bridge, San Franscisco downtown, Bay எனப் பல காட்சிகளையும் பார்த்து ரசித்த வேளையில் விமானம் தரையிறங்கியது. WhatsAppல் தகவல் தெரிவித்து விட்டு மருமகனுக்குத் தொலைபேசி விட்டு (அது வரை charge இருந்தது) வாசலுக்கு வந்ததும் மருமகனின் காரில் ஏறி வீட்டை நோக்கிப் பயணித்தோம். இத்தனை கலவரத்துக்கிடையில் பெட்டிகளுக்கான காத்திருப்பு இல்லை என்பது தான் ஒரே சுகம். காலை பத்து மணிக்கு முடிய வேண்டிய பயணம் எங்கே செல்கிறோம் என்ன செய்கிறோம் என்றே தெரியாமல் குழப்பமாக வித்தியாசமாக “திக் திக்” தருணங்களுடன் மதியம் 3.30 மணிக்கு முடிவுக்கு வந்தது. 

மருமகன்: நீங்கள் எந்த ஊரிலிருந்து வருகிறீர்கள்?

நாங்கள்: (மிகப் பெருமையாக) San Antonio

மருமகன்: ஒரு மணி நேரத்தில் வந்து விட்டீர்கள். சூப்பர்

40 நிமிடப் பயண நேரத்தில் வீட்டை வந்தடைந்த பிறகு …

நான்: San Antonio நகரில் ஊருக்கு நடுவில் நதி ஓடும் என்றார் உன் தந்தை ஆனால் அதை நாங்கள் காணவில்லை என்றேன்.

மகள்: அம்மா…மூளையை கொஞ்சம் பயன்படுத்தேன்…
டெக்சாஸ் மாநிலம் எதிர்த் திசையில் உள்ளது; ஒரு மணி நேரத்தில் இங்கு வந்து சேர முடியுமா? நீங்கள் சென்றது Santa Ana, Los Angeles.

ஓ......

 

 

 

 

 

 

 

சிங்கம் பார்க்கப் போகலாமா?

1-1-2025

ஏழாவது அமெரிக்கப் பயணத்தின் ஒரு பகுதியாக ஜனவரி 1-4, 2025 தேதிகளில் மகனது குடும்பத்துடன் கலிபோர்னியா மாகாணத்தில் உள்ள சான் டியாகோ (San Diego) நகருக்குச் செல்லும் வாய்ப்புக் கிடைத்தது. கிறிஸ்துமஸ் தின விடுமுறை முடிந்த சில நாட்களில் அரிசோனா மாநிலத்தின் பீனிக்ஸ் நகருக்குப் பயணித்து அங்கிருந்து மறுநாளே சான் டியாகோ பயணம் என்பதால் சற்றே நெருக்கமான பயணமாக இது அமைந்தது.

முதல் பேரனுக்கு 1.5 வயதாக இருந்த போது (2010) லாஸ் ஏன்ஜல்ஸ் நகரை சுற்றிப் பார்த்து விட்டு இந்த நகருக்குச் சென்று Sea World என்னும் theme parkல் சென்று நாள் முழுவதும் கழித்து விட்டு வீடு திரும்பினோம். வேறெங்கும் செல்லாததால் ஊரைப் பற்றிய நினைவு எதுவும் இல்லை.

இம்முறை மீண்டும் ஒரு குட்டிப் பேரன், 4.5 மணி நேர கார் பயணம் போன்ற காரணங்களால் இந்தப் பயணமும் 2010 பயணம் போலவே Electric rice cooker, அரிசி, பருப்பு, instant foods என ஜனவரி 1, 2025 காலை பத்து மணியளவில் அருகிலுள்ள சாய்பாபா கோவிலுக்குச் சென்ற பிறகு எங்கள் 5.30 மணி நேர சாலைப் பயணம் தொடங்கியது.

நகரை நோக்கிச் செல்லுமுன் சில அடிப்படை விவரங்களைத் தெரிந்து கொள்வோமா?

சான் டியாகோ தென் கலிபோர்னியாவில் பசிபிக் பெருங்கடல் ஓரத்தில் மெக்சிகோ நாட்டு எல்லையில் அமைந்துள்ள மலைப்பாங்கான ஒரு நகரம். இந்த நகரின் பொருளாதாரம் கப்பற்படை சார்ந்த தொழில்கள், சுற்றுலா, உற்பத்தித் துறை, வெளிநாட்டு வாணிகம் மற்றும் ஆராய்ச்சிகள் ஆகியவற்றைச் சார்ந்துள்ளது. இந்த நகரில் புகழ்பெற்ற பல்கலைக் கழகங்கள் உள்ளன. ஒரே ஓடுபாதையுடன் கூடிய மிகவும் பிசியான விமான நிலையம் இங்குள்ளது. மெக்சிகோவுக்கு மிக அருகில் உள்ளதால் ஸ்பானிஷ் மொழி பேசும் மக்கள் இங்கு அதிகம் வசிக்கிறார்கள்.

Bay, hills, mountains and canyons என இந்த நகரம் அமைந்துள்ளதால் இதன் பருவநிலை micro climate என அழைக்கப் படுகிறது. ஒரு பகுதியில் வெயில் மறு பகுதியில் மழை என வெவ்வேறு விதமான காலநிலை நிலவுகிறது. பொதுவாக வருடம் முழுவதும் வெயில் உள்ள நகரம் என்பதால் மக்களால் பெரிதும் விரும்பப்படுகிறது. இந்த நகரின் எல்லையில் மெக்சிகோ நாட்டின் Baja California மாநிலத்தைச் சேர்ந்த Tijuana என்னும் நகரம் உள்ளது. சான் டியாகோ போல அதுவும் சுற்றுலா மற்றும் உலக வர்த்தகத்திற்குச் சிறப்புப் பெற்றது. (கப்பற்படை ஏன் இந்த நகரில் அமைந்துள்ளது என இப்போது புரிந்திருக்கும்)

சாலைப் பயணத்தின் முதல் இரண்டு மணி நேரங்கள் அரிசோனா மாநிலம் என்பதால் வழியெங்கும் பாலைவனக் காட்சிகளே தென்பட்டன. (வறண்ட நிலப்பகுதி, விதம் விதமான உயரமான, குட்டையான, குண்டான, உருண்டையான கள்ளிச் செடிகள்) வழியில் Sentinel என்னும் ஊரின் rest areaவில் நின்று குட்டிப் பாப்பாவிற்கு அங்கே சென்ற மிக நீ……ண்ட சரக்கு ரயிலை வேடிக்கை காட்டி உணவு தந்து விட்டு மீண்டும் கிளம்பிய சமயம் லேசாகக் குளிரத் தொடங்கியது.

வழியில் மெக்சிகோ நாட்டின் எல்லையை ஒட்டி அமைந்துள்ள Yuma என்னும் நகரைக் கடந்து செல்ல வேண்டும். அந்தப் பகுதியில் நாங்கள் பயணித்த சாலைக்கு இடப்புறம் பல மைல்களுக்கு இரு நாடுகளுக்கிடையேயான எல்லையைக் குறிக்கும் வகையில் கம்பி வலை போடப்பட்டுள்ளது. ஆங்காங்கே நாட்டைக் கடக்க check postகள் உள்ளன. மிக அதிக அளவில் இரு நாடுகளுக்கிடையேயான தரை வழி வியாபாரம் இந்தப் பகுதியில் சிறப்பாக நடைபெறுகிறது. பெருமளவில் பொருட்களை ஏற்றிச் செல்லும் ட்ரக்குகள் இரு நாட்டு எல்லைக்கிடையே வந்து செல்வதைக் காண முடிந்தது.

நாங்கள் சென்ற சமயம் day light saving எனப்படும் பகற்பொழுது குறைவான நேரம் என்பதால் மாலை 5 மணியளவில் இருட்டத் தொடங்கியது. மெக்சிகோ நாட்டின் நகரங்களும் கிராமங்களும் இரவின் விளக்கொளியில் பார்க்க அழகாகத் தெரிந்தன. ஊருக்குத் திரும்பும் சமயம் எல்லையில் நின்று புகைப்படம் எடுத்துக் கொள்ள எண்ணி இருந்தேன். பாப்பாவின் jacketஐ எடுத்து வரவில்லை என்பது நினைவுக்கு வர, வழியில் ஒரு ஊரில் நிறுத்தி புதிதாக jacket வாங்கிக் கொண்டு பயணத்தைத் தொடர்ந்தோம்.

இரவு 9 மணியளவில் சான் டியாகோ நகரின் Hotel Marriotஐ அடைந்தோம். அனைவரும் தங்கும் வகையிலான பெரிய அறையை அடைந்து கையில் எடுத்து சென்றிருந்த சப்பாத்திகளை உண்டு விட்டு மழலையில் குட்டி பேரன் பேசிய பேச்சுக்களை ரசித்து விட்டு அன்றைய நாளை முடிவுக்குக் கொண்டு வந்தோம். Day light saving என்பதால் பீனிக்ஸ் நகர நேரத்தை விட இந்த நகரத்தில் ஒரு மணி நேரம் பின்னால் இருந்தது என்றாலும் மறுநாள் சுற்றிப் பார்க்க சீக்கிரம் கிளம்ப வேண்டும் என்பதால் உறங்க சென்றோம். விடுதிக்கு மிக அருகில் freeway எனப்படும் நகரின் பிரதான சாலை இருந்தது. மிக வேகமாகச் செல்லும் வாகனங்களின் (பெரும்பாலும் கார்களே) விர்…..விர்….ஜன்னலைத் திறக்கவே முடியவில்லை. நகரின் பல பகுதிகளிலும் மலைத் தொடர்களே தெரிந்தன. விடுதிக்கு எதிரில் சுற்றிலும் அரை வட்ட வடிவில் குன்றுகள் அவற்றின் மேலே வீடுகள், தெளிவாகத் தெரிந்த வானம் (இரவில் நட்சத்திரங்களும் பகலில் நீல வானமும்) என ரம்மியமாக இருந்தது.

2-1-2025

மறுநாள் காலை ஹோட்டலில் தரப்பட்ட continental breakfast ஐ 8.30 மணியளவில் உண்டு விட்டு ஊர் சுற்றிப் பார்க்கக் கிளம்பினோம். Marriot hotelலில் மிகவும் சுமாரான காலை உணவு அளிக்கப்பட்டது சற்றே வியப்பாக இருந்தது. பழத் துண்டுகள் தீர்ந்து விட்டால் மறுமுறை அவை நிரப்பப் படவில்லை. பழரசங்கள், பாலும் அப்படியே. பாப்பாவிற்கு Instant அவல் உப்புமாவை அறையிலேயே தயார் செய்து கொடுத்தோம். Rice cookerல் சாதம் வைத்து புளி சாதமாக மாற்றி பேக் செய்து எடுத்துக் கொண்டு 9 மணியளவில் ஊர் சுற்றக் கிளம்பினோம்.

Downtown எனப்படும் நகரின் முக்கிய பகுதி San Diego Bayயில் அமைந்துள்ளது. Downtown பகுதியைக் கடந்து San Pasqual Valleyயில் அமைந்துள்ள San Diego Zoo Safari Park என்னும் இடத்தை அடைந்தோம். இந்தப் உயிரியல் பூங்கா(zoo) உலகின் தண்ணீர் குறைவான பகுதிகளில் (அன்டார்டிகா தவிர) வசிக்கும் மிருகங்கள் மற்றும் அரிய வகை விலங்கினங்களுக்கானது. இங்குள்ள botanical gardenல் ஒரு மில்லியன் (10 லட்சம்) தாவரங்கள் உள்ளதாக அறிகிறோம்.

இந்தப் பூங்கா ஆசியா, ஆப்பிரிக்கா (அதன் பல்வேறு பகுதிகள்), சிங்கங்கள் வசிக்கும் பகுதி எனப் பல வகையாகப் பிரிக்கப் பட்டு மிருகங்கள்/ செடிகள் பராமரிக்கப் படுகின்றன. பூங்காவின் உள்ளே நுழைந்ததும் கையில் வரைபடத்தை (map) எடுத்துக் கொண்டு முதலில் எங்கே செல்வது என ஆராய்ந்தோம். Tramல் இந்தப் பூங்காவை சுற்றிப் பார்க்க முடியும் என்பதால் அடர்ந்த செடி/மரங்களுக்கிடையில் சிறு பாலங்களைக் கடந்து வந்து மிக நீண்ட வரிசையில் காத்திருந்தோம். இந்தப் பூங்கா பல ஏக்கர் பரப்பளவில் பல பகுதிகளாகப் பிரிக்கப்பட்டுள்ளது. நடந்தும் ஜீப்களிலும் ட்ராமிலும் செல்லலாம். இரவில் தங்கி camp செய்யும் வசதியும் உண்டு. சக்கர நாற்காலி, சிறு சைக்கிள், குழந்தைகளை அழைத்துச் செல்லும் stroller ஆகியவற்றையும் வாடகைக்குப் பெற்றுக் கொள்ளலாம். நடந்து சென்ற வழியில் Nairobi village, Walkabout Australia, African plains, Asian plains என ஒவ்வொரு பகுதிக்கும் பெயரிடப்பட்டு அந்த நிலப்பகுதி தொடர்பான விலங்கினங்கள்/பறவைகள் பார்வைக்குக் கிடைத்தன. 

அன்றைய தினம் விடுமுறை என்பதால் வரிசையில் 40 நிமிடக் காத்திருப்புக்குப் பிறகு டிராமில் ஏறினோம். பொறுமையாக வண்டி கிளம்பியது. முதலில் சிறு குளம் அதில் பல வாத்துக்கள் என ஆரம்பித்து ஒட்டக சிவிங்கி, ஒட்டகம், யானை, காட்டெருமை, மான் எனப் பல மிருகங்களையும் அருகில் சென்று பார்த்து விட்டுத் திரும்பினோம். வழியில் ஆங்காங்கே ஜீப்களும் பேட்டரி கார்களும் மிருகங்களுக்கு மிக அருகில் நின்று கொண்டிருந்தன. நீர் குறைந்த (arid regions) பகுதியில் உள்ள விலங்குகளுக்கான சரணாலயம் என்று நாம் முன்பே அறிந்திருந்தாலும் வறண்ட பகுதியில் மிருகங்களைக் கண்ட போது சற்றே வருத்தமாக/ஏமாற்றமாக இருந்தது. இங்குள்ள சிறு குளங்கள், நீர் நிலைகளில் உள்ள நீர் மறுசுழற்சி(recycling) செய்யப்பட்டு செடிகளுக்குப் பயன்படுத்தப் படுகிறது.

அந்தப் பகுதிக்கு அருகில் ஒரு hot air balloon இருந்ததைக் கண்டதும் அதில் செல்ல முடிவு செய்தோம். Hot air balloon பயணம் இன்னும் என் bucket listல் உள்ள ஒன்று. வழக்கமாகச் செல்லும் பலூன் போல அல்லாமல் மோட்டாரின் உதவியுடன் மேலெழும்பிச் செல்லும் வகையில் இருந்தது. வரிசையில் காத்திருந்து (கூட்டமில்லை) பலூனில் மேலேறி உயரே சென்று பூங்காவினை பறவைப் பார்வையில் கண்டோம். ஒரு பகுதி பச்சைப் பசுமையாக இருந்தாலும் மறுபகுதி வறண்டு ஏறக்குறைய பாலைவனம் போலக் காட்சியளிக்கிறது.

அந்தப் பூங்காவிலேயே கையில் எடுத்துச் சென்ற உணவினை உண்ட பிறகு 45 நிமிட நேரப் பயண தூரத்தில் உள்ள Balboa Park என்னும் இடத்தை நோக்கிப் பயணித்தோம். மதிய நேரமாக இருந்தாலும் ஜனவரி மாதம் என்பதால் வெப்பத்தின் தாக்கம் இல்லை. இந்த Balboa Park18 பூங்காக்கள், 60+ மைல்கள் நடக்கும் பாதை (walking trail), அருங்காட்சியகங்கள் (museums), performing art venues, recreational resources மற்றும் San Diego Zoo வை உள்ளடக்கியது. 1200 ஏக்கர் பரப்பளவிலான இங்கே Lawn bowling, Archery, Tennis, Golf, Swimming, Disc golf ஆகியவற்றுக்கான விளையாட்டு மைதானங்கள் மற்றும் திறந்த வெளிகள், சிறு மேட்டுப் பகுதிகள் போன்றவையும் உள்ளன. மொத்தத்தில் இந்தப் பூங்கா இயற்கை, கலை, கலாச்சாரம், மானுடவியல், பொழுதுபோக்கு அம்சங்கள் ஆகிய அனைத்தும் கலந்த ஓரிடம் எனக் கூறலாம். 

எங்கெங்கும் மக்கள் வெள்ளம் என்பதை விட எங்கெங்கும் கார்களின் அணிவகுப்பு. பூங்காவிற்கு அருகில் காரை நிறுத்த இடமில்லாமல் சுற்றிச் சுற்றி வந்து சற்று தொலைவில் நிறுத்தி விட்டு நடந்து உள்ளே சென்றோம். பூங்கா ஆரம்பத்திலேயெ Japanese garden தென்பட்டது. உள்ளே நுழைந்ததும் வரலாற்றை நினைவு படுத்தும் வண்ணம் கட்டப்பட்ட கட்டிடங்களைக் காண முடிகிறது. ஒரு சாலையில் வரிசையாக இரு புறமும் அருங்காட்சியகங்கள் மற்றும் கலையரங்குகள் தென்பட, ரயில் மியூசியம் செல்லலாம் என முடிவு செய்து உள்ளே சென்றோம். (ஓரே நாளில் பல இடங்களை சுற்றிப் பார்த்தால் சலுகை விலை அனுமதி சீட்டுக்கள் கிடைக்கும்) தனித் தனியாக ஒவ்வொரு இடத்திற்கும் அனுமதி சீட்டு தேவையில்லை. அருங்காட்சியகங்களைக் காண்பது எனக்கு மிகவும் பிடித்தமானது என்றாலும் குட்டிப் பேரனுக்காக 17 அருங்காட்சியகங்களில் ஒன்றை மட்டும் பார்த்தோம். (இந்தப் பூங்காவை சுற்றிப் பார்க்க ½ நாளெல்லாம் போதாது)

ரயில் அருங்காட்சியகத்தில் வட அமெரிக்க ரயில் வரலாற்றை தத்ரூபமாகக் காட்டும் வகையில் ஒவ்வொரு பழமையான ரயிலும் சென்ற பாதையை 3D மாடலாக வடிவமைத்து ரயில் மலை, பாலம், குகை, கிராமம் எனச் செல்லும் வகையில் இருந்தது. திரும்பிய பக்கமெல்லாம் பொம்மை ரயில்கள் ஓடிக் கொண்டிருந்தன. பேரனை விட நான் அதிகம் ரசித்தேன். அங்கிருந்து கிளம்பி மிருகக் காட்சி சாலைக்குச் செல்லும் முன்பாக குட்டிப் பேரனுக்காக குட்டி ரயிலில் பயணிக்க வரிசையில் காத்திருந்தோம். நானும் என் கணவரும் வேடிக்கை மட்டுமே. பயணியர் செல்லும் ரயில்கள் வட அமெரிக்காவின் பல பகுதிகளிலும் இல்லையென்பதால் சிறுவர்களுக்கு ரயில் என்றாலே ஆச்சரியம் தான். 5 கிமீ வேகத்தில் செல்லும் பொம்மை ரயிலில் செல்ல கூட்டம் அலைமோதும்.😊 டிக்கெட்டுகளும் அசாத்திய விலைக்கு விற்கப்படுகின்றன.

அடுத்ததாக மிருகக் காட்சி சாலைக்குச் சென்றோம். Safari Park zoo போல அல்லாமல் இங்கே அந்தந்த மிருகத்திற்கான வசிப்பிடத்தை உருவாக்கி வைத்திருக்கிறார்கள். எங்கெங்கும் அடர்ந்த மரங்கள், செடி கொடிகள் எனத் தென்பட்டன. கோலா கரடி உட்பட பல மிருகங்கள் இருந்தன. பார்க்கும் இடமெல்லாம் உணவகங்கள் தென்பட்டன. (மக்கள் உணவு உண்ணவும் பானங்களைக் குடிக்கவும் நேரம் காலம் பார்ப்பதில்லை) இந்த மிருகக் காட்சி சாலையும் அதிகப் பரப்பளவைக் கொண்டது. நடந்தோ மாடி பேருந்திலோ சென்று மிருகங்களைக் காணலாம். நாங்கள் பேருந்திற்காகக் காத்திருந்து முதலாம் தளத்தில் அமர்ந்தோம். வரிசையாகப் பேருந்துகள் மக்களை அழைத்துச் சென்று திரும்பி வந்து கொண்டே இருந்தன. சற்றே மேடான பகுதியில் இந்த பேருந்து சென்றது. ஒவ்வொரு மிருகத்தின் அருகிலும் நிறுத்தி அவை பற்றிய விளக்கம் கூறி மக்கள் பார்த்து ரசித்ததும் மீண்டும் பயணம் தொடங்கியது.

Day light saving மாதம் என்பதால் மாலை 4.30க்கே இருட்டத் தொடங்கியது. கடைகள் மற்றும் பூங்காவில் வண்ண விளக்குகள் எரியத் தொடங்கின. 40 நிமிட நேரம் சுற்றிப் பார்த்த பிறகு பேருந்து கிளம்பிய இடத்திற்கு அருகில் வந்து நின்றது. அருகில் இருந்த கடையில் அனைவரும் coffee, hot chocolate என வாங்கிக் குடித்த பிறகு குட்டிப் பேரன் பல சிறுவர்கள் நடனம் ஆடிக் கொண்டிருந்ததைக் கண்டு தானும் ஆடினார். இச்சமயம் நன்றாக இருட்டி விட்டது. பூங்காவின் மற்றொரு பகுதியில் cable carல் சென்று பூங்காவின் மொத்தப் பரப்பளவையும் பார்க்கும் வசதி இருப்பதைக் கண்டு அங்கு சென்று cable carல் ஏறினோம். வழக்கம் போல் அவசரமாக இரண்டிரண்டு பேர் ஒரு காரில் ஏறி (கிட்டத்தட்ட டவுன் பஸ்ஸில் ரன்னிங்கில் ஏறுவது போல) பயணித்தோம். மேலிருந்து பறவைப் பார்வையில் San Diego நகரின் இரவுக் காட்சிகளைக் காண முடிந்தது. இந்த ஊரின் விமான நிலையம் ஒரே ஒரு runway உள்ளதால் எப்போதும் விமானங்கள் ஏறி இறங்கிக் கொண்டே இருந்தன. San Diego Bay அருகில் downtown, மற்றொரு புறம் விமான நிலையம், கீழே மிருகக் காட்சி சாலை, பூங்காவின் வண்ண விளக்குகள் என…திருவிழாக் கோலத்தைக் காண முடிந்தது.

பயணம் முடிந்ததும் கீழிறங்கி சிறிது தொலைவு நடந்து பூங்காவின் முன் பகுதிக்கு வந்த போது முன்பு சென்ற சிறு ரயில் தற்போது வண்ண விளக்குகளுடன் சென்று கொண்டிருந்ததைக் கண்டதும் குட்டிப் பேரனுக்கு மிக்க மகிழ்ச்சி. மகன் நடந்து சென்று காரை எடுத்து வரும் வரை வேடிக்கை பார்த்துக் கொண்டிருந்தோம். திரும்பும் வழியில் ஒரு இந்திய உணவகத்தில் தோசை, இட்லி என வாங்கி இரவு உணவை முடித்துக் கொண்டு விடுதிக்குத் திரும்பினோம்.  

3-1-2025

அன்றைய தினம் சனிக்கிழமை என்பதால் அருகிலிருக்கும் பெருமாள் கோவிலுக்குச் சென்ற பிறகு எங்கள் சுற்றுலாவைத் தொடங்குவதாக முடிவு செய்தோம். சுறுசுறுப்பாக எழுந்து தயாராகி அன்றைய பகல் உணவை தயார் செய்து எடுத்து வைத்தோம். நான் என் மகன் கணவர் மூவரும் 7.30க்கே காலை உணவிற்குச் சென்றதால் எல்லா உணவுகளும் இருந்தன. Bread toast, chocolate milk, juice, fruits தான் எங்கள் உணவு. மருமகளும் குட்டியும் திடீர் உப்புமா, Bread toastஐ உண்டு விட்டு கோவிலுக்குச் சென்று அங்கு பொங்கல், பாயசம் என கிடைத்த பிரசாதத்தை பாப்பாவிற்கு ஊட்டி விட்ட பிறகு ஊர் சுற்றக் கிளம்பினோம். 

முதலில் San Diego Bayயிலிருந்து கிளம்பும் City Tours Cruise படகில் பயணித்து திமிங்கிலங்களைக் காணச் செல்வதாக ஏற்பாடு. காலை 9.30 மணிக்குக் கிளம்பும் படகில் செல்ல வேண்டும். அவசரமாக சாலைக்கு எதிரில் காரை நிறுத்தி விட்டு ஓட்டமாக ஓடி ஏறவும் படகு கிளம்பவும் சரியாக இருந்தது. படகின் பின் புறத்தில் திறந்த வெளியில் நின்ற படி பயணத்தை ஆரம்பித்த போது skyline எனப்படும் உயரமான கட்டிடங்களடங்கிய நகர்ப்புறம் நேரெதிரிலும் வலப்புறம் ஒரு மிகப் பெரிய பாலமும் இன்னும் சற்று தூரத்தில் கப்பல் கட்டும் இடமும், ராணுவக் கப்பல்கள் நிற்கும் இடமும் இடப்புறத்தில் விமான நிலையத்தில் ஏறி இறங்கும் விமானங்களும் கண்ணில் பனிமூட்டத்திற்கிடையே தெரிய எங்கள் பயணம் தொடங்கியது. சாலையை ஒட்டி ஒரு பிரம்மாண்டமான ராணுவக் கப்பல் அதன் மேல் தளத்தில் சிறு விமானங்கள் என ஒரு வித்தியாசமான காட்சியும் துறைமுகத்தை ஒட்டியே தெரிந்தது. (குட்டிப் பேரனின் பஸ் மேலே கார், டிரக் மேலே கார் பாட்டு போல கப்பல் மேலே விமானம்)

இந்தத் துறைமுகம் இயற்கையாக அமைந்துள்ளது. மெக்சிகோ எல்லைக்கு மிக அருகில் இருப்பதால் ராணுவம், சுற்றுலா, பொருளாதாரம் ஆகியவற்றிற்குக் கைகொடுக்கும் ஒன்றாக உள்ளது. இந்தத் துறைமுகத்திலிருந்து உல்லாசக் கப்பல்கள் உலகின் பல இடங்களுக்கும் செல்கின்றன. தற்சமயம் ஏறக்குறைய 50 கப்பல்களே செல்வதாகக் கூறினார்கள். நாங்கள் படகில் ஏறிய இடத்திற்கு அருகிலேயே சில உல்லாசக் கப்பல்களைக் காண முடிந்தது. Boating, fishing, kayaking, whale watching மற்றும் பல நீர் சார்ந்த செயல்பாடுகளும் இங்கே நடைபெறுகின்றன. இந்தத் துறைமுகத்தின் ஒரு பகுதி உலகின் அரிய உயிரினங்களுக்காக ஒதுக்கப்பட்டுள்ளது. கப்பல் கட்டும் இடமும் துறைமுகப் பகுதியில் உள்ளது.

படகு முன்னேறி செல்லச் செல்ல பனிமூட்டம் குறைந்து சுற்றிலும் தென்பட்ட காட்சிகளைக் காண முடிந்தது. முதல் தளத்தில் அமர்ந்து திமிங்கிலங்கள் கண்ணில் படுகின்றனவா எனப் பார்த்துக் கொண்டே சென்றோம். கடுமையான குளிர் காற்றடித்ததால் சிறிது நேரத்திற்குப் பிறகு கீழடுக்கில் சென்றமர்ந்தோம். உணவுப் பொருட்களும் குளிர்பானங்களும் அங்கேயே விற்பனை செய்யப் படுகின்றன. இந்தப் படகுப் பயணம் commentaryயுடன் கூடியது என்பதால் வழியில் தென்படும் இடங்கள்/காட்சிகளின் வர்ணனைகளைக் கேட்டுக் கொண்டே செல்ல முடிகிறது. ஏறக்குறைய ஒரு மணி நேரப் பயணத்திற்குப் பிறகு படகின் இரண்டு பக்கமும் நூற்றுக் கணக்கான டால்பின்கள் துள்ளிக் குதித்தபடி செல்வதைக் கண்டோம். மேலும் பல நிமிடங்கள் திமிங்கிலம் தென்படுமா எனப் பயணித்து விட்டு ஊரை நோக்கித் திரும்பினோம். திமிங்கிலங்கள் சில சமயம் மட்டுமே கண்ணில் தென்படுகின்றன. நம்முடைய அதிர்ஷ்டத்தைப் பொறுத்து என வைத்துக் கொள்ளலாம்.

நகரை நோக்கிய பயணம் சற்றே அலுப்பாக இருந்தது. துறைமுகத்தின் வலப்புறத்தில் The Coronado bridge என்னும் பெயருடைய 2.12 மைல் நீளப் பாலம் San Diego Bay வை Coronado தீவுடன் இணைக்கும் பாலமாகும். வில்லைப் போல வளைந்து நிற்கும் இந்தப் பாலம் 200 அடி உயர ராணுவக் கப்பல்கள் கடந்து செல்லும் வகையில் வடிவமைக்கப் பட்டுள்ளது. மக்கள் இருபுறமும் செல்ல வசதியான இந்தப் பாலத்தில் ஓட்டப் பந்தயம், சைக்கிள் பந்தயம் போன்றவைகளும் நடைபெறும். துறைமுகத்தை நெருங்கும் சமயம் வெயிலாக இருந்ததால் kayaking, jet boat போன்ற செயல்பாடுகள் அதிகம் தென்பட்டன. ஒரு வழியாக துறைமுகத்தை அடைந்து படகை விட்டுக் கீழிறங்கினோம். Whale watching செய்யலாம் எனபது தான் இந்த படகுப் பயணத்தின் நோக்கம். Whaleஐ பார்க்க முடியாவிட்டால் இன்று எங்களுடன் பயணம் செய்தவர்கள் மீண்டும் இலவசமாக நவம்பர் 2025க்குள் மீண்டும் பயணிக்கலாம் என முன்பே அறிவிக்கப்பட்டபடி கீழிறங்கியதும் எங்களுக்கான Redemption ticketsஐ கையில் கொடுத்து அனுப்பினார்கள். (எத்தனை பேர் அதை பயன்படுத்துவார்கள்?)

வெளியில் வந்து வலப்புறம் திரும்பி சில நிமிட நடையில் நாம் படகிலிருந்து கண்ட USS Midway Naval Warship Museum. 1945 முதல் 1992 முடிய ராணுவ சேவையாற்றிய இந்த பிரம்மாண்டமான கப்பல் போரிலும் அமைதிப் பணிகளிலும் ஈடுபட்டது. ஏறக்குறைய 2,00,000 வீரர்கள் இதில் பணியாற்றியுள்ளார்கள் எனத் தகவல். 2004ஆம் ஆண்டு இந்தக் கப்பல் அருங்காட்சியகமாக மாற்றப்பட்டது. நாமே audio tour மூலம் கப்பலின் பல பகுதிகளையும் காணலாம். மேல் தளத்திற்குச் செல்ல lift வசதி உள்ளது. அந்தத் தளத்தில் போர்க்காலங்களில் பயன்படுத்தப்பட்ட விமானங்கள், ஹெலிகாப்டர்கள் மற்றும் பல விதமான விமானங்களை காட்சிப்படுத்தியுள்ளார்கள். https://en.wikipedia.org/wiki/USS_Midway_Museum எத்தனை விமானங்கள் அங்கே உள்ளன என்பதை இந்த linkஐ அழுத்தி தெரிந்து கொள்ளலாம்.

தரைத் தளத்தில் ஓய்வு அறைகள், அலுவலர்கள் தங்குமிடம், எஞ்சின் அறை, விமானக் கட்டுப்பாட்டு அறை இப்படி 60 பகுதிகள் உள்ளன. இங்கு ராணுவ வீரர்களின் ஓய்வு விழா, புதிதாக ஆள் சேர்க்கை, ராணுவ மரியாதை போன்ற பல நிகழ்வுகள் நடைபெறுகின்றன. பள்ளி மாணவர்கள் வருடத்திற்கு 5,000 பேர் இரவில் தங்கி இந்தக் கப்பலைப் பற்றி அறியும் வசதியும் உண்டு. கப்பலின் மேல் தளத்திலிருந்து பார்க்கையில் படகிலிருந்து தெரிந்த அனைத்தும் நன்றாக பறவைப் பார்வையில் தெரிந்தது. கப்பலின் வலப்புறத்தில் ஒரு ராணுவ வீரர் தன் காதலி/மனைவி?! யை அணைத்தபடி நிற்கும் மிக உயரமான சிலை உள்ளது. சிறுவர்களும் பெரியவர்களும் விமானங்களில் அமர்ந்து புகைப்படம் எடுத்தும் கொள்ளலாம். கீழ்த் தளத்தில் flight simulator ஒன்றும் உண்டு.

இந்தக் கப்பலை சுற்றிப் பார்த்து விட்டு கார் நிறுத்தியிருந்த பகுதிக்கு வந்து எங்கள் மதிய உணவை உண்டதும் விடுதியை நோக்கிக் கிளம்பினோம். அன்றைய மாலையில் மீண்டும் முடிந்தால் Balboa Park செல்லலாம் என முடிவு செய்தோம். மறுநாள் காலை பீனிக்ஸ் கிளம்ப வேண்டும் என்பதால் இரவு உணவிற்கு மட்டும் வெளியில் சென்றோம். சுவையான இந்திய உணவுகளை உண்டு விட்டு பெட்டிகளை அடுக்கி வைத்து விட்டு உறங்கச் சென்றோம்.

4/1/2025

காலை உணவினை முடித்துக் கொண்டு வழியில் Palm Spring என்னும் ஊரினைப் பார்த்து விட்டு பீனிக்ஸ் செல்வதாக முடிவு செய்யப்பட்டது. இந்த நகரம் தெற்கு கலிபோர்னியாப் பாலைவனப் பகுதியான Coachella Valleyயில் அமைந்துள்ளது. லாஸ் ஏஞ்சலீஸ் நகரிலிருந்து இரண்டு மணி நேரப் பயணத்தில் உள்ள இந்த ஊருக்கு நாங்கள் சாலை மார்க்கமாகப் பயணிக்கையில் பலவிதமான காட்சிகளையும் காண முடிந்தது. குறிப்பாக Fedexன் மிகப் பெரிய storage unit. பலவிதமான பாலைவனக் காட்சிகளும் நவீனக் கட்டிடங்களும் உள்ள இந்த ஊரில் ஹாலிவுட் நடிகர்கள் தங்கி செல்வது கூடுதல் கவர்ச்சி.

இந்த ஊரின் மற்றொரு சிறப்பம்சம் Aerial tramway எனப்படும் 360 டிகிரி சுழன்றபடி மேலேறும் cable car. ஏறக்குறைய 2.5 மைல் மலை உச்சி நோக்கிய பயணம். (உலகின் மிகப் பெரிய rotating cable car எனக் கூறப்பட்டாலும் இதே போன்ற ஒன்றில் ஸ்விட்சர்லாந்து சென்ற போது Mr.Titlis உச்சிக்கு சென்றோம்) சான் டியாகோ நகரிலிருந்து ஏறக்குறைய 3 மணி நேரப் பயணத்தில் இந்த ஊரை அடைந்தோம். ஊரை விட்டுத் தனித்து உள்ள இந்த இடத்திற்குச் செல்லும் சாலை திரும்பும் இடத்தில் Waiting time 2-3 hrs என display board கூறியது. கார்களை எங்கே நிறுத்த வேண்டும் என checkpostல் கூறப்பட்ட படி நிறுத்தி விட்டு அங்கிருந்து பயணிகளை cable car கிளம்பும் இடத்திற்கு அழைத்துச் செல்லும் பேருந்துக்கான வரிசையில் காத்திருந்து சென்றோம். அனுமதி சீட்டுக்களை வாங்கிய பிறகு மீண்டும் காத்திருப்பு. மதியம் 1.30 க்கு தான் எங்கள் முறை என்பதால் அருகில் போடப்பட்டிருந்த நாற்காலிகளில் அமர்ந்து வேடிக்கை பார்த்தோம். (2.30 மணி நேரங்கள் காத்திருந்தோம்)

மதிய உணவை முடித்துக் கொண்டு குட்டிப் பேரனின் அட்டகாசங்களை ரசித்து, புகைப்படங்கள் எடுத்துக் கொண்டு எங்கள் முறை வந்ததும் cable carல் ஏறிக் கிளம்பினோம். இந்த cable car 80 பேர் நின்று கொண்டே பயணிக்கும் வசதி உடையது. மிக மெதுவாக 360 டிகிரி சுழன்று கொண்டே மேலேறிய போது Chino Canyonனின் அழகினையும், ஊரையும், நீண்டு செல்லும் சாலைகளையும் காண முடிந்தது. 8516 அடி உயரத்தில் அமைந்த மலை உச்சியில் பயணம் முடிவடையும் இடத்தில் Mt. San Jacinto State Park உள்ளது. (மலையின் பெயர் என்னவென்று சொல்ல வேண்டுமா?)

Mountain stationல் இரண்டு உணவகங்கள், observation decks, natural history museum, two documentary theatres, gift shop எனப் பல வசதிகளும் உள்ளன. Station உள்ளே இருக்கும் படிக்கட்டுகளில் இறங்கி வெளியே சென்றால் அடர்த்தியான மரங்களடர்ந்த பகுதி. அரிய வகை பறவைகளும் மிருகங்களும் உள்ள இந்தப் பகுதியில் 50 மைல் நீளத்திற்கு hiking trails உள்ளன. சில நிமிடங்கள் அந்தப் பகுதியை வேடிக்கை பார்த்து விட்டு மீண்டும் மேலேறி observation deckல் நின்று வேடிக்கை பார்த்தோம். மலையின் மறுபக்கம் பாலைவனக் காட்சிகள் தெரிகின்றன. சில நிமிடக் காத்திருப்புக்குப் பிறகு மீண்டும் கேபிள் காரில் கீழிறங்கினோம். இச்சமயம் சூரியம் மறையத் தொடங்கியதால் நகரின் இரவுக் காட்சிகள் தென்பட்டன. பேருந்தில் ஏறிக் கீழிறங்கி வந்து காரில் வீட்டை நோக்கிய பயணத்தை மாலை 5.30 மணியளவில் ஆரம்பித்தோம்.   

மலை மேலிருந்து இறங்க பேருந்துக்குக் காத்திருந்த நேரத்தில் பலர் கார்களில் இரவு camping செய்வதற்கான உபகரணங்களுடன் வந்திறங்கினார்கள். Mt. San Jacinto State Parkல் தங்க முன் அனுமதி வாங்க வேண்டும். பேருந்து நின்றதும் மக்கள் வரிசையில் நின்றிருந்தாலும் முண்டியடித்து ஏறினார்கள். வளைந்து நெளிந்து செல்லும் சாலைப் பயணம் சற்றே சிரமமாக இருந்தது. காரிலிருந்து ஊருக்குச் செல்லும் முக்கிய சாலை வரை மேடும் பள்ளமுமாக வளைந்து நெளிந்த சாலைகளே. கூட்டு ரோட்டில் Display board waiting time 3 hours எனக் காட்டியது. Freeway எனப்படும் national highwayல் மூன்று லேன்கள் இருந்தாலும் வழக்கம்போல இல்லாமல் குறுகலாக இருந்தன. எங்கள் காருக்கு மிக நெருக்கமாக டிரக்குகள் கடந்து சென்றன. இரவு ஒம்பது மணியளவில் பீனிக்ஸ் நகரில் உள்ள வீட்டை வந்தடைந்தோம்.

திரும்பும் வழியில் மெக்சிகோ எல்லையில் புகைப்படம் எடுக்கலாம் என்ற என் ஆசை நிறைவேறவில்லை ☹அன்றே செய் அதை நன்றே செய் என்பது இதற்கு மிகவும் பொருந்தும்.

வித்தியாசமான நில அமைப்புக்கள், தாவர விலங்கின வகைகள், பல வகை காலநிலைகள், நகருக்குள் விமான நிலையம், அடர்ந்த மரங்களடங்கிய பகுதிகள் என அமைந்துள்ள சான் டியாகோ நகருக்குச் சென்றதும் வித்தியாசமான பயணமே.

Tramல போய் giraffe பாத்தோமே!

 

 

   

 

 

     

 

 

திரைகடலோடி…(பகுதி 3)

26/12/2024

COCO CAY

Florida மாகாணத்தின் Fort Lauderdale துறைமுகத்தில் தொடங்கிய எங்கள் உல்லாசக் கப்பல் பயணத்தின் இறுதி நாள் காலை ஆறு மணியளவில் எழுந்து எங்கிருக்கிறோம் என பால்கனிக்குச் சென்று பார்க்கையில் Coco Cay தீவின் துறைமுகத்திற்கு அருகில் நங்கூரம் பாய்ச்சும் சமயத்தில் இருந்தோம். (துறைமுகம் என ஒரு புரிதலுக்காகக் கூறுகிறேன். இது செயற்கையாக அமைக்கப்பட்ட Pier. ஒரு நீண்ட நடைமேடை, அதற்கு இரு பக்கமும் இரண்டு கப்பல்கள் நிற்கும்படியான வசதி, தீவை இணைக்கும் ஒரு அகலமான பாலம் அவ்வளவே) எப்படி கப்பலை reverse எடுத்து கரையை ஒட்டி இடிக்காமல் நிறுத்துகிறார்கள் என அரை மணி நேரம் நடைபெற்ற அந்த வேலையை சில நிமிடங்கள் வேடிக்கை பார்த்தேன். (நீண்ட நடைமேடைக்கும் கப்பலுக்கும் இடையில் மிகப் பெரிய இரும்பு உருளைகள் உள்ளன) எங்களுக்கு முன்பாக மற்றொரு Carribean நிறுவன உல்லாசக் கப்பல் நிறுத்தப்பட்டிருந்தது. (சுற்றுலாக்களில் எப்போதும் இரண்டு கப்பல்கள்/படகுகள்/பேருந்துகள்/கார்கள் என சேர்ந்து செல்வது வழக்கம்) கப்பலில் இருந்து பார்க்கையில் water slide, hot air balloon போன்ற theme parkற்கான அம்சங்கள் தென்பட்டன.

அன்றைய தினம் காலை 9 மணிக்குத் தான் கீழிறங்க வேண்டும் என்பதால் நிதானமாகத் தயாரானோம். Deck 5ல் உள்ள காபி கடையிலிருந்து மருமகன் அனைவருக்கும் வாங்கி வந்த காபி, hot chocolate போன்றவற்றை குடித்து விட்டு பேரன்களுடன் காலை உணவிற்காக Deck 11 சென்றோம். [எங்கம்மா உங்களை சாப்பிட அழைத்துப் போகச் சொன்னார்] 12 வயதான சின்னப் பேரன். மிகப் பொறுப்புடன் liftல் அழைத்துச் சென்று எங்களுக்கு உணவகத்தில் உட்கார இடம் பிடித்துக் கொடுத்து, பால், பழம் போன்றவைகளைக் கொண்டு வந்து தந்து உபசரித்தார். மற்றவர்களும் வந்து சேர, உள்ளேயும் வெளியேயும் வேடிக்கை பார்த்தபடியே காலை உணவை முடித்துக் கொண்டு கப்பலை விட்டுக் கீழிறங்க Deck 1 ஐ நோக்கிச் சென்றோம்.

இந்தத் தளம் Gangway என கப்பல் terminology படி அழைக்கப் படுகிறது. [கப்பல் நிறுவனம் app மூலமாக Gangway, port side, starboard side, embarkation, disembarkation, Port of call etc போன்ற வார்த்தைகளைப் பயணிகள் தெரிந்து வைத்திருக்க வேண்டும் என வலியுறுத்தி இருந்தது) Gangway என்பது கப்பலை விட்டு வெளியேறும் வாயில் என வைத்துக் கொள்ளலாம். கப்பலுக்கும் தரைக்கும் இடையில் தற்காலிகப் பாலம் நிறுத்தப்பட்டு மக்கள் ஏறி இறங்க வழி செய்யப்படுகிறது.

முதல் தினம் போல் அல்லாமல் தேவையான அளவுக்குத் துண்டுகளை(towels) பெற்றுக் கொண்டு கீழிறங்கினோம். கீழிறங்கியதும் ஒரு அகலமான நடைமேடை/பாலத்தில் நடந்து 200 மீட்டர்கள் சென்றால் தீவை அடையலாம்.

இந்தத் தீவைப் பற்றிய சிறு அறிமுகத்துடன் உள்ளே செல்வோம். முதலில் Cay என்றால் என்ன?

Cay என்பது a small low island comprised of coral or sand என்கிறார் கூகிள் ஐயனார். சிறிய தீவு அல்லது மண் மேடு அல்லது பவழப் பாறை(coral reef) என வைத்துக் கொள்வோம்.Berry islands என்னும் தீவுக் கூட்டங்களில் ஒன்றான இந்த சிறு தீவு Naussauவிலிருந்து ஏறக்குறைய 89 கிலோமீட்டர் தொலைவில் உள்ளது. Little stirrup cay (அ) Coco cay என்னும் பெயருடைய இந்தத் தீவு ராயல் கரீபியன் நிறுவனத்தின் சொந்தத் தீவு. இந்த நிறுவனத்தின் கப்பல்கள் மட்டுமே இங்கு வந்து உல்லாசப் பயணிகளை இறக்கி விட முடியும். [அருகிலுள்ள Great Stirrup cays என்பது Norwegian cruise நிறுவனத்திற்குச் சொந்தமானது]. இந்தத் தீவு கிழக்கு மேற்காக 1.57 கி.மீ தெற்கு வடக்காக 0.47 கி.மீ என்னும் அளவில் மிகச் சிறியது. நடந்தே சென்று சுற்றிப் பார்க்கலாம்.

2019 ஆம் ஆண்டு இந்தத் தீவு $250 மில்லியன் டாலர்கள் செலவில் புதுப்பிக்கப்பட்டு Perfect day at Coco cay எனப் பெயரிடப்பட்டது. வடக்கில் கப்பல்கள் வந்து நிற்கும் வகையில் pier, மேற்கில் நீச்சல், ஓய்வெடுக்கும் வகையில் bearch chairகள், நிழற்குடைகள், கடைகள், கிழக்கில் water slides (2 nos) மற்றும் சில விளையாட்டுக்கள், carribean என எழுதப்பட்ட மிகப் பெரிய hot air balloon, zipline போன்றவைகளும், அதையொட்டி அடர்த்தியான மரங்களும் அதற்குப் பின்னால் 18+ வயதானவர்கள் மட்டும் செல்லும் வகையில் ஒரு கடற்கரையும் என நாள் முழுவதும் எல்லா வயதினரும் பொழுது போக்கும் வண்ணம் அமைக்கப்பட்டுள்ளது. கப்பல் நிறுவனத்தின் சொந்தத் தீவு என்பதால் இங்கு ஒரு உணவகம் அமைக்கப்பட்டு மதிய உணவு, கோன் ஐஸ், குளிர்பானங்கள் போன்றவைகள் அனைவருக்கும் வழங்கப்படுகிறது. தீவில் இரண்டு நீச்சல் குளங்களும் உள்ளன.

நிற்க.

கப்பலிலிருந்து இறங்கி மிக அருகில் நின்று கொண்டிருந்த மற்றொரு கப்பலுக்கு இடையில் இருந்த நடைமேடையில் நடந்து கடலின் மேல் அமைந்துள்ள பாலத்தைக் கடக்கும் போது தீவின் ஆரம்பத்தில் இடப்புறம் The Perfect day, வலப்புறம் The Coco cay என்னும் பெயர்ப் பலகைகள் தென்பட்டன. தீவின் ஆரம்பத்தில் மூன்று இளம் பெண்கள் பஹாமாஸ் நாட்டின் தேசிய நடனம் ஆடிப் பயணிகளை வரவேற்றார்கள். ஒரு பயணியும் நின்று நடனத்தைப் பார்க்கவும் இல்லை பாராட்டவும் இல்லை.

கப்பல் பயணம் தொடங்குவதற்குப் பல நாட்களுக்கு முன்பே water parkல் விளையாட முன்பதிவு செய்ய வேண்டும். மகள் குடும்பம் முன்பதிவு செய்ய முயற்சி செய்த போது ஏற்கனவே அந்த வசதி முடிந்து விட்டது.[பந்திக்கு முந்து… என ஒரு பழமொழி உண்டு. அதையொட்டி உல்லாசக் கப்பலின் உணவு விடுதியோ விளையாட்டுக்களோ நாம் முந்திக் கொண்டால்தான் இடம் கிடைக்கும்] முன்பதிவில்லாமல் விளையாட ஒருவருக்கு $100 கொடுத்து டிக்கெட் வாங்க வேண்டும். மேலும் கூட்டம் அதிகம். பேரக் குழந்தைகள் அதில் விருப்பம் காட்டாததால் கடற்கரையை நோக்கி நடக்கத் தொடங்கினோம். கடற்கரையெங்கும் நாற்காலிகள், குடைகள் அமைக்கப்பட்டு மக்கள் ஓய்வெடுக்கும் வண்ணம் இருந்தது. நீச்சல் தெரிந்தவர்கள் கடலை நோக்கிச் செல்ல வழக்கம் போல நானும் என் கணவரும் வேடிக்கை பார்த்துக் கொண்டிருந்தோம். பின் வரிசையில் தமிழ்க் குரல் கேட்கவே அவர்களுடன் உரையாடினோம்.

மேற்கு அட்லான்டிக் கடலில் அமைந்துள்ள பஹாமாஸ் தீவுகளைச் சுற்றியுள்ள நீர் மிகத் தூய்மையாக aqua marine நிறத்தில் காட்சியளிக்கிறது. கடல் நீரின் நிறத்தை ஒட்டி இளம் நீலம், இளம் பச்சை, வெள்ளை நிறங்களில்(இவைகள் கரீபியன் நிறங்கள் என அழைக்கப்படுகின்றன என ஒரு புத்தகத்தில் படித்தேன்) நாற்காலிகள், குடைகள் தென்னை மரங்களுக்கு இடையில் போடப்பட்டிருந்தன. பார்க்கவே மனதுக்கு ரம்மியமாக இருந்தது. சிறிது நேரம் காலை நீட்டி beach chairல் அமர்ந்திருந்த நேரத்தில் நேரெதிரில் தெரிந்த சிறிய கலங்கரை விளக்கம் (lighthouse), நாங்கள் வந்த கப்பல்கள், கடலின் அமைதியான தெளிவான நீர், சுற்றிலும் இருந்த தென்னை மரங்கள், பல வண்ண நீச்சல் உடைகளில் மக்கள் எனப் பலவும் கண்ணில் பட்டது. கண்ணில் பட்ட தீவு ஊழியர்கள் அனைவரும் ஆப்பிரிக்கர்களே. [எத்தனை நிறங்கள் எத்தனை விதங்களில் நீச்சல் உடைகள் உண்டோ அத்தனையும் காண முடிந்தது. கப்பலிலிருந்து பெறப்பட்ட துண்டுகள் அனைத்தும் இளம் நீல நிறம் மட்டுமே]

எவ்வளவு நேரம் அமர்ந்திருப்பது? மக்கள் உணவகத்திலிருந்து கோன்ஐஸ் lemonade என வாங்கி வருவதைக் கண்டு மகளும் லெமனேட் வாங்கி வந்தார். தீவை explore செய்ய எண்ணி நான் மட்டும் அங்கிருந்த கடைகளை சுற்றிப் பார்க்கத் தொடங்கினேன். பருவ நிலை மிதமான வெப்பத்துடன் இருந்தது (தமிழகத்தைத் தவிர வேறெங்கும் வியர்ப்பதில்லை) இடையில் இந்தியாவில் உள்ள உறவினருக்கு வீடியோ காலில் தீவைக் காட்டியபோது கரீபியன் நாடுகளில் தென்னை மரங்களின் கீழே தேங்காய்கள் விழுந்து கிடக்கும் யாரும் எடுக்க மாட்டார்கள் எனப் படித்திருக்கிறேன் அப்படி ஒரு காட்சியைப் பார்த்தீர்களா எனக் கேட்டார்கள். என் பதில் “இல்லை”. நாங்கள் சென்ற இடங்கள் சுற்றுலாத் தலங்கள் என்பதால் தென்னை/பனை மரங்களின் காய்த மட்டைகள் வெட்டப் பட்டு காய்கள் இல்லாமல் காட்சியளித்தன. [தேங்காய்/மட்டை யார் தலையிலாவது விழுந்தால் கப்பல் நிறுவனம் பல லட்சம் டாலர்களை நட்ட ஈடாகத் தர வேண்டி இருக்குமே?]

வருடத்தில் 360 நாட்கள் வெயில் உள்ள நாடு என்பதால் கடைகளில் பருத்தியாலான ஆடைகளையே விற்பனைக்கு வைத்திருந்தார்கள். தென்னை நாரிலிருந்து செய்யப்பட்ட தொப்பிகள் பைகள் போன்றவைகள், fridge magnets, மற்றும் பிற நினைவுப் பொருட்கள் என விற்பனை செய்து கொண்டிருந்தார்கள். நான் ஒரே ஒரு fridge magnet வாங்கினேன். அனைவரும் credit/debit card உபயோகிப்பதால் பணமாக வாங்கிக் கொள்வீர்களா எனக் கடைக்காரரிடம் கேட்டேன். அவர் ஒத்துக் கொண்டு மீதி சில்லறையைத் தந்தார். 200 மீட்டர் நடந்தால் தீவைச் சுற்றிக் காட்டும் டிராம் உள்ளதாகத் தெரிந்ததும் நாங்கள் அதிலேறி சுற்றி வந்தோம். வழியெங்கும் அடர்த்தியான மரங்கள், சில வண்ண செம்பருத்தி பூச்செடிகள் தென்பட்டன.

Hot air balloonஐக் கட்டி வைத்திருக்கிறார்கள். அது வெறும் காட்சிப் பொருள் மட்டுமே. மீண்டும் அதே டிராமில் ஏறி வரவேண்டுமென்றால் ஒரு மைல் நீள வரிசையில் நிற்க வேண்டும் என்பதால் நடந்து ஐந்து நிமிடங்களில் நாங்கள் அமர்ந்திருந்த நாற்காலிகளுக்கு வந்து சேர்ந்தோம். அமர்ந்த சில நிமிடங்களில் கடற்கரையில் ஒரே பரபரப்பு. Security guards மற்றும் paramedics போன்றோர் அவசரமாகக் கடலை நோக்கி ஓடினார்கள்.

பேரக் குழந்தைகளும் அவர்களின் தகப்பன்களும் அந்தப் பகுதியில் தான் நீந்திக் கொண்டிருந்தார்கள் என்பதால் வேகமாக நாங்களும் சென்றோம். மிக மிக குண்டான ஒரு பெண்மணிக்கு மூச்சு விடுவது சிரமமானதால் அந்தப் பரபரப்பு எனத் தெரிந்தது. அவரை ஒரு ஜீப்பில் ஏற்றி அழைத்துச் சென்றார்கள். அதே சமயத்தில் குளிக்கச் சென்றவர்கள் திரும்பி வந்ததும் மனதுக்கு நிம்மதியாக இருந்தது. மதிய உணவிற்காக அமைக்கப் பட்டிருந்த இடத்திற்குச் சென்றோம். மிகப் பெரிய கூடத்தில் விதம் விதமான உணவுகள் அடுக்கி வைக்கப் பட்டிருந்தன. இங்கும் buffet முறை தான் என்பதால் வேண்டிய உணவுகளை எடுத்துக் கொண்டு வெளியில் இருந்த மேசைகளில் அமர்ந்து உண்டோம். இங்கு மெக்சிகன் மற்றும் ஆங்கிலேய உணவுகள் அதிகமாக இருந்தன. இந்திய உணவுகள் எதுவும் இல்லை.

Tacos, salads, salsa, toppings, breads, cut fruits, whole fruits, cone ice cream, lemonade, iced tea, iced water என ஒவ்வொன்றுக்கும் ஒரு தனி counter இருந்தது. எங்களால் சாப்பிட முடிந்த உணவுகளை எடுத்து வந்து சாப்பிட்டு முடிந்து விட்டு சிறிது தூரம் அங்குமிங்குமாக நடந்து, புகைப்படங்கள் எடுத்துக் கொண்டு மாலை 4.30 மணியளவில் கிளம்பிக் கப்பலின் உள்ளே சென்றோம்.

அடுத்த சில நிமிடங்களில் பேரக் குழந்தைகள் 12ஆவது அடுக்கிலுள்ள நீர் சார்ந்த விளையாட்டுக்களை விளையாடுவதாகத் தகவல் வர அங்கே வேடிக்கை பார்க்கக் கிளம்பினோம். பீனிக்ஸ் நகரிலிருக்கும் இரண்டு வயதுப் பேரனுக்கு நீர் விளையாட்டுக்களை வீடியோ காலில் காட்டிய போது தானும் ஒரு பெட்டியின் மூடியில் wave surfing செய்வது போல விளையாடிக் காட்டினார்.

சிறிது நேரத்தில் இரண்டாவது கப்பலும் (Utopia of seas) கிளம்பி எங்களைத் தாண்டிச் சென்றது. 5400 பயணிகள் செல்லக் கூடிய மிகப் பெரிய உல்லாசக் கப்பலான அதனுள்ளே சிறு ரயில் வண்டி கூட இருப்பதாக மகள் கூறினார். Utopia என்ற வார்த்தையின் பொருள் an imagined place or state of things in which everything is perfect. அதில் எங்களுக்கு டிக்கெட் கிடைக்கவில்லை என மகள் கூறினார். [நான் படித்த ஆங்கில இலக்கியப் பாடம் ஒன்றில் St. Thomas More என்பவர் எழுதிய Utopia என்னும் பாடத்தில் ஒரு அரசு/நாடு எப்படி இருந்தால் perfect ஆக இருக்கும் என விளக்கப்பட்டிருக்கும். நம் இந்திய நாட்டு வழக்கில் “ராம ராஜ்ஜியம்” எனக் கூறலாம். அந்த அடிப்படையில் பார்த்தால் மேற்படி கப்பல் perfect என்னும் படி கட்டப்பட்டுள்ளதாகக் கொள்ளலாம்] பொதுவாக ஒரு நிறுவனத்தின் கப்பல்கள் பெயர்களில் ஒரு uniformity இருப்பது போலத் தான் பெயரிடப்படுகின்றன. Royal Caribbean நிறுவனக் கப்பல்கள் சிலவற்றின் பெயர்கள் : Liberty of the seas( நாங்கள் சென்ற கப்பல்), Oasis of the seas, Wonder of the seas, Allure of the seas, Odyssey of the seas, Utopia of the seas, Quantum of the seas etc.

கப்பலில் நமது அறையை தினமும் சுத்தம் செய்து கட்டிலின் மேல் சிறிய துண்டினை அழகாக மடக்கி ஒரு மிருகம்/பறவை போல தினமும் வைக்கப் பட்டிருந்தது. சுத்தம் செய்யும் ஊழியர்களுக்கு தினப்படி tips (gratuity என கப்பல் app கூறியது) ஆக  நம்முடைய room service bill தொகையிலிருந்து 18% கூடுதலாக கப்பல் நிறுவனமே நம்முடைய security depositலிருந்து கழித்துக் கொள்ளும். என் app $18 கழிக்கப் பட்டுள்ளதாகத் தெரிவித்தது. நாம் வாங்கிய பஞ்சு மிட்டாய், காபி, நினைவுப் பொருட்கள் போன்றவற்றிற்கான பணமும் இதிலிருந்தே கழிக்கப்படும். [பயணம் முழுவதும் நம்மிடமிருந்து பணம் வாங்குவதில்லை. அண்ணாச்சி கடை போல கணக்கு வைத்துக் கொள்கிறார்கள்] கூடுதலாக நாம் டிப்ஸ் தர விரும்பினால் அறையைக் காலி செய்யும் போது அதற்கென வைக்கப்பட்டிருக்கும் கவரில் வைத்துக் விட்டு வரலாம். (ஒரு பயணிக்கு 1-5 நாள் பயணத்திற்கு100$). ஒவ்வொரு நிறுவனத்திற்கும் இந்தத் தொகைகள் மாறுபடும்.

கப்பல் பயணங்களில் மதுவகைகளின் புழக்கம் அதிகமாக இருக்கும் எனக் கூறப்பட்டது. (இது இலவசம் இல்லை, முன் கூட்டியே குறிப்பிட்ட package களுக்கு பணம் கட்டினால் மட்டுமே தேவைப்பட்டதை வாங்க முடியும்) நீச்சல் குளம், jacuzzi போன்றவைகள் பெரியவர்களும் சிறுவர்களுக்கும் தனித் தனியாக இருந்தன என்பதால் இரவு 9 மணி முடிய மக்கள் அந்தப் பகுதிகளில் இருந்தார்கள்.

இரவு உணவில் கூடுதலாக vegan chocolate browny இருந்தது. என்னுடைய கப்பல் தோழி Renalynஐ சந்தித்து நன்றி கூறி $10 டிப்ஸ் தந்து, selfie எடுத்துக் கொண்டேன். மறுநாள் காலை Port Lauderdaleல் கரையிறங்க வேண்டும். யார் யார் எத்தனை மணிக்கு வெளியேற வேண்டும் என முதல் நாளே appல் தகவல் வந்து விட்டது. அவரவர் அறைக்கு வெளியில் பெட்டிகளை label ஒட்டி இரவே வைத்து விட்டால் காலை கப்பலை விட்டு இறங்கியதும் நம் பெட்டிகளை துறைமுகத்தில் பெட்டிகள் வைக்கும் இடத்தில் எடுத்துக் கொள்ளலாம். பெட்டிகளைத் தாமே எடுத்துச் காலை 6.30க்கே கிளம்ப வேண்டும். கப்பலின் இரண்டு liftகளில் மக்கள் கீழிறங்கிச் சென்று கொண்டிருக்கும் வேளையில் மனிதர்களுக்கு இடம் கிடைக்கவே நேரமாகும் என்பதால் இரவே பெட்டிகளை நம் பெயர் மற்றும் இறங்கும் குழுவின் எண் கூடிய tagஐக் கட்டி அறைக்கு வெளியில் வைத்து விட்டோம்.

தூக்கம் வரவில்லையென்பதால் அறையில் இருந்த தொலைக்காட்சி பெட்டியின் ஒவ்வொரு சானலாகத் திருப்பிக் கொண்டிருந்த போது கப்பல் எந்த இடத்தில் உள்ளது எத்தனை வேகத்தில் செல்கிறது அந்தப் பகுதியில் கடலின் ஆழம் என்ன என்பது போன்ற விவரங்களை live ஆக ஒளிபரப்பிக் கொண்டிருந்ததைக் கண்டோம். நாங்கள் கண்ட சமயம் 4.5 நாட்(knot) வேகத்தில் சென்று கொண்டிருந்தது. மறுநாள் காலைக்குள் ஏறக்குறைய 300 கிலோமீட்டர்கள் பயணிக்க வேண்டும் என்பதால் 24.5 நாட் வேகத்தில் செல்ல ஆரம்பித்தது. (வெளிப்புற வெப்பம் 24 டிகிரி C, 330 மீட்டர் ஆழம், இதுவரை 465 நாட் பயணித்திருக்கிறோம்) கையில் எடுத்துச் சென்ற night lamp பயனுள்ளதாக இருந்தது. [Extension cord பயன்படவில்லை]

நாங்கள் அனைவரும் நிதானமாக காலை உணவை முடித்துக் கொண்டு 9.30 மணிக்கு கப்பலை விட்டு இறங்கக் கிளம்பினோம். Deck 4ல் அமைக்கப் பட்டிருந்த பாலத்தின் வழியாகக் கீழிறங்க மிக நீண்ட வரிசையில் காத்திருந்து கீழிறங்கினோம். (தரையில் கால வைக்க Deck 1 gangway) வரிசையில் நகர்ந்த போது எங்களுக்கு ஒதுக்கப்பட்டிருந்த dining hallகளைக் கடந்து செல்ல நேர்ந்தது. அங்கே இரவு உணவு மாலை 5.30 மணிக்கே ஆரம்பம். அங்கிருந்த notice boardல் 25/12/2024 அன்று Mediterranean menu 26/12/2024 Caribbean menu என்பது போல எழுதி இருந்தது. அந்த உணவகம் மிகவும் சிறப்பாக வடிவமைக்கப்பட்டிருந்தது. [சைவ உணவுகள் இங்கே கிடைக்குமா என்பது சந்தேகமாக இருந்ததால் Windjammer buffet உணவத்திற்கே சென்றோம்].

விமானத்திலிருந்து இறங்கும் பாலம் போல இருந்த பாலத்தில் கீழிறங்கியதும் எங்களுக்கு ஒதுக்கப்பட்டிருந்த குழு எண் உள்ள இடத்தில் பெட்டிகள் இருந்தன. வெளியில் செல்லும் வரிசையில் நின்று Biometric facial recognition machineல் புகைப்படம் எடுத்துக் கொண்டு security officer தலையாட்டியதும் துறைமுகத்தின் வெளியே சென்றோம். இங்கும் எங்கள் passportஐ பரிசோதிக்கவில்லை.  

FORT LAUDERDALE

மாலை 4 மணிக்குத் தான் சான்பிரான்சிஸ்கோ விமானம் என்பதால் அடுத்து என்ன என்ற என் கேள்விக்கு நாம் விமான நிலையத்திலேயே பெட்டிகளை லாக்கரில் வைத்து விட்டு Fort Lauderdale கடற்கரைக்குச் செல்லப் போகிறோம், மதிய உணவிற்குப் பிறகு விமான நிலையம் திரும்புகிறோம் எனக் கூறப்பட்டது. இம்முறை Uberல் கிளம்பிக் Hollywood கடற்கரைக்குச் சென்றோம். மியாமி கடற்கறைக்கு மிக அருகிலிருக்கும் இந்தக் கடற்கரையும் மிக நீண்ட வெண்மணல் உள்ள கடற்கரைதான். கடலை ஒட்டி அடுக்கு மாடிக்கட்டிடங்கள் பல உள்ளன.

இந்தக் கடற்கரை மணலில் ஆங்காங்கே சங்குகள் தென்பட்டன. பொறுமையாகப் பொறுக்கத் தொடங்கிய போது அவை பல நிறங்களில், டிசைன்களில் உள்ளதைக் கண்டேன். இயற்கையாகவே அவைகளில் கழுத்து செயினில் கோர்த்துக் கொள்ளும் வகையில் ஓட்டை இருந்தது. (sand dollar) அமைதியான கடல்பகுதி என்பதால் மக்கள் ஆங்காங்கே குளித்துக் கொண்டும் வெயிலில் காய்ந்து கொண்டுமிருந்தார்கள். நாங்கள் சென்ற பகுதியில் மக்கள் கூட்டம் இல்லை. உடன் வந்தவர்கள் reel எடுக்க முயற்சி/பயிற்சி செய்து கொண்டிருந்தார்கள். எங்கள் விமானம் ஒரு மணி நேரம் தாமதமாகக் கிளம்பும் எனத் தகவல் கிடைக்கவே அங்கிருந்து நகரின் மையப்பகுதியில் உள்ள இந்திய உணவகம் ஒன்றிற்குச் செல்ல முடிவு செய்து கிளம்பினோம்.

வெயில் விரும்பிகள் தலையில் தொப்பியுடன் சாலைகளில் நடந்து கொண்டிருந்தார்கள். (பல வருடங்களுக்கு முன் பார்த்த ஒரு திரைப்படத்தில் பார்த்த/கேட்ட வசனங்களை நினைக்காமல் இருக்க முடியவில்லை.

ஆங்கிலேயர்: Good morning. This is a sunny day

மயில்சாமி (மொழிபெயர்ப்பாளர்): உச்சி வெயில் மண்டைய பொளக்குது

சாலைகளின் இரு பக்கமும் மரங்கள் சீராக வளர்க்கபட்டு பார்க்கவே அழகாக உள்ளது. கிறிஸ்துமஸ் சமயம் என்பதால் ஆங்காங்கே விளக்கலங்காரங்களும் தென்பட்டன.

இந்திய உணவகத்தில் தோசை, இட்லி, சப்பாத்தி, பருப்பு சாதம், தயிர் சாதம் என அவரவருக்கேற்ற உணவுகளை உண்டு விட்டு இரவு உணவிற்கு எனக்கும் என் கணவருக்கும் சாதம், தயிர் போன்றவற்றை கையில் எடுத்துக் கொண்டு விமான நிலையம் கிளம்பினோம். அங்கு சென்றதும் எங்கள் United airlines விமானம் மேலும் தாமதமாகக் கிளம்பும் எனத் தெரிந்தது. Fort Lauderdale -> Chicago -> SFO என எங்கள் பயணம் அமைக்கப்பட்டிருந்தது. சிகாகோ செல்ல தாமதமானால் அடுத்த விமானத்தைக் கண்டிப்பாகப் பிடிக்க முடியாது. மேலும் சிகாகோவில் டிசம்பர் மாதத்தில் கடும் பனிப்பொழுவு இருக்கும் என்பதால் விமானம் கிளம்புமா என்பதே சந்தேகம். இதை எல்லாம் தவிர்க்க Fort Lauderdale -> SFO செல்லும் 7.30 விமானத்திற்கு டிக்கெட்டுகளை மாற்றினார் மருமகன். இரவு உணவை அங்கேயே உண்டு விட்டு விமானம் ஏறினோம்.

United Airlines விமானத்தில் ஆபத்துக் கால விவரங்களை விளையாட்டாக, வித்தியாசமாக, ஒவ்வொரு ஊராக செல்வது போல, அங்கே விமானப் பணிப்பெண் சமயம் பார்த்து விவரங்கள் கூறுவது போல வடிவமைத்து சுவாரசியமாக இருக்கையின் முன்னால் இருந்த inflight entertainment திரையில் காட்டினார்கள். ரசிக்கத்தக்க வகையில் இருந்தது. 5 Inflight entertainmentல் விமானம் எந்தப் பாதையில் செல்கிறது (Florida, Louisiana, Texas, Arizona and & California) என்பதைப் பார்த்துக் கொண்டிருந்தபோது அந்தந்த ஊரின் சிறப்புக்கள் பக்கத்தில் விளக்கப் பட்டிருந்தது. இடையில் மிகப் பெரிய நகரான Houston வந்தது. பல நிமிடங்கள் அந்த நகரின் மேலே விமானம் பறந்த போது நகரின் இரவுக் காட்சியைக் காண அற்புதமாக இருந்தது. வட அமெரிக்காவின் மிகப் பெரிய மாகாணமான Texasஐக் கடக்க ஏறக்குறைய ஒரு மணி நேரத்திற்கும் மேலானது. 5.44 மணி நேரப் பயணம் முடிந்து San Franscisco நகரில் நேர வித்தியாசம் காரணமாக இரவு 9 மணிக்குத் தரையிறங்கினோம்.

இந்தப் பயணத்தின் மூலம் உல்லாசக் கப்பல் துறை என்பது எவ்வளவு முதலீட்டை உள்ளடக்கியது என்பது பற்றிய பல தகவல்களை அறிய முடிந்தது. விமானங்களைப் போல உல்லாசக் கப்பல் துறை மிகச் சிறப்பாகச் செயல்படுகிறது. மியாமி AA துறைமுகத்தில் நாங்கள் பார்த்த போது வரிசையாக 10-12 பிரம்மாண்டமான உல்லாசக் கப்பல்கள் நின்று கொண்டிருந்தன. Miami, Fort Lauderdale, Cape Canaveral, Los Angeles, San Diego, Seattle எனப் பல துறைமுகங்களிலிருந்தும் பல கப்பல்கள் மெக்சிகோ, அலாஸ்கா, தென் அமெரிக்கா, அன்டார்டிக் என பூமிப் பந்தின் எல்லாப் பகுதிகளுக்கும் மக்களை அழைத்துச் செல்கின்றன. இந்தியாவில் பல வருடங்களாக மும்பை-கோவா இடையே க்ரூஸ் கப்பல்கள் செல்கின்றன. [இவை அளவில் சிறியவை] ஐரோப்பாவின் ர்iver cruise, ஆப்பிரிக்காவின் நைல் நதிப் பயணம் போன்றவை சிறப்பு மிக்கவை. [சமீபத்தில் அலாஸ்கா சென்று வந்த உறவினர் அங்கிருக்கும் பனிப் பாறைகள் இன்னும் பத்து வருடங்களில் காணாமல் போய்விடும்; பார்க்க விரும்புபவர்கள் விரைவில் செல்லுங்கள் எனக் கூறினார்]

நாங்கள் சென்ற கப்பல் Freedom class என்னும் வகையைச் சேர்ந்த மிகப் பிரம்மாண்டமான கப்பல். 7 விதமான உல்லாசக் கப்பல்களை இந்த் நிறுவனம் இயக்குகிறது. இவை பற்றி விரிவாகத் தெரிந்து கொள்ள விரும்புபவர்கள் கீழே உள்ள linkஐ அழுத்தவும்.

https://thepointsguy.com/cruise/royal-caribbean-ship-class-guide/

Pirates of the Caribbean (movie), Bermuda triangle, Cuba, West Indies எனப் பல தகவல்களை அறிந்திருந்தாலும் நானும் கரீபியன் நாடு ஒன்றிற்குச் செல்வேன் என்று நினைத்ததில்லை.

புயல், சூறாவளி போன்ற இயற்கை சீற்றங்கள், நோய்த் தொற்றுக்கள் எதுவும் இல்லாமல் பயணம் இனிமையாக அமைந்ததற்கு கடவுளுக்கு நன்றிகள். இரண்டு மாதங்களாகியும் மறக்க முடியாத மிக வித்தியாசமான உல்லாசக் கப்பல் பயணத்தை ஏற்பாடு செய்த மகள் குடும்பத்தாருக்கு நன்றி. Google ஐயனாருக்கும் நன்றி.

Liberty of the seas…

பின் குறிப்பு: Cruise கப்பல்களைக் காண விரும்புபவர்கள் Youtubeல் காணலாம். “மன்மதன் அம்பு” என்ற திரைப்படத்தில் விரிவாகக் காட்சிப்படுத்தி இருக்கிறார்கள்.